Sopelako Helduen Hezkuntzako Zentroak (HHZ) kultur etxeko hirugarren pisuan duen egoitza berriko ateak ireki zituen hilaren hasieran. Aurretik Enrique Urrutikoetxea kalean zegoen eta, bertatik egoitza berrira eramatea "lan handia" izan bada ere, gelak ikastaro berriari ekiteko prest daude. Orotara sei ikasgela ditu, horietako bat informatikakoa eta beste bat irakasleentzat. Zentroko irakasle Amaia Garagorrik azaldu duenez, "egia da batzutan txiki gelditzen dela, ikasleen kopuru handia baitugu, baina momentuz ongi konpontzen ari gara". Irekitze ekitaldiak 100 pertsona inguru bildu zituen, ikasle, irakasle eta gonbidatuak batuta. Ekitaldian, olerki bat irakurri zuen ikasle batek, eta beste bat (82 urtekoak) zentroan izandako bere esperientziaz mintzatu zen. Bestalde, egoitza berriaren eraldaketa islatzen zuten irudi desberdinak erakutsi ziren, lanak hasi aurretik eta bukaerako emaitzara arte.
Gaur egun, Sopelako Helduen Hezkuntzako Zentroak 200 ikasle inguru ditu, 19 eta 80 urte bitartekoak, baita goragokoak ere. Programak ikastaro eta tailer anitz ditu: alfabetatzea, gaztelerazko ikasbidea, graduatu-titulua eskuratzeko ikastaroa, kultura sakontzea. Ikasleek informatikako eskolak jaso ditzakete, baita azalpenak dituzten musika entzunaldiak, historia eta zinea, hizkuntzak (ingelesa eta euskara), osasun tailerra, artea, gimnastika mentala edota literatura hizketaldiak ere. Garagorrik azaldu duenez, "ikastaro guztiek onarpen maila handia dute, baina bereziki informatikak eta ingelesak. Ondoren artea eta historia eta zinea egongo litzateke. Oso gustura gaude, itxarote lista luzea baita". Ikastaroek goizeko eta arratsaldeko ordutegia dute, 9:00etatik 13:00etara eta 16:00etatik 20:00etara. Interesa duten pertsonak egoitzara joan daitezke edota telefono bitartez jarri daitezke harremanetan: 946 765 764 zenbakian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun