Uholdeak izateko arriskua gutxitu arren, ibaietatik gertu bizi direnei erne egotea aholkatu diete
Euskal Autonomia Erkidegoan (EAE) uholdeak izateko arriskua gutxitzen ari da, baina atzo abiatutako Larrialdi Plana mantendu egingo du Eusko Jaurlaritzako Herrizaingo Sailak. Bestalde, Neguko Bidezaintza Planak martxan jarraitzen du eta gaur arratsaldean 400 metrotan elurra egingo duela aurreikusten da. Herrizaingo Sailak jakinarazi duenez, Araba, Bizkaia eta Gipuzkoako ibai guztiak daude ohikoa baino emari handiagoaz, "baina batek ere ez du alerta maila gainditzen", euren hitzetan. Gainera, urtegiak gehienezko edukiera mugan daude baina egungo egoera ez dute "kezkagarritzat" jotzen. Euskalmeten aurreikuspenen arabera, datozen orduetan euriteak atzo izandakoak baino askoz urriagoak izango dira. Hala ere, gaur goizean izandako bileraren ondotik, ibaietatik gertu bizi direnei erne egotea, ibilgailuak ibilguen inguruetan ez aparkatzea eta lonjak eta garajeak uzteko prest egotea aholkatu die. Argazkian, azaroaren 3an Algortako Zubilleta auzoko bizilagunek helarazitako irudia.
Gaur goizeko lehen orduan bilera bat egin dute Lakuan Herrizaingo Saileko, Euskalmeteko eta Eusko Jaurlaritzako Uren ordezkariek, egoera aztertzeko eta beharrezko neurriak hartzeko asmoz. Ertzaintzak, DYAk, Gurutze Gorriak eta Babes Zibileko boluntarioek erne jarraitzen dute, baita udalek ere. Egoera horren aurrean, Herrizaingo Sailak ibaietatik gertu bizi direnei erne egotea, ibilgailuak ibilguen inguruetan ez aparkatzea eta lonjak eta garajeak uzteko prest egotea aholkatu die. Gainera, herritarrei, orokorrean, informatzea, bakoitzak bere burua babesteko neurriak hartzea eta, ahal den neurrian, itsasoan eta, orokorrean, kalean arrisku jarduerarik ez egitea gomendatu die. Halaber, errepide bidezko joan-etorriak, ahal den neurrian, saihestea eta inora joan behar izatekotan, arretaz gidatzea gomendatu du Herrizaingo Sailak, ur-putzuak, lur-jausiak edota elurra egon daitekeelako errepidean
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun