Aranjuezen "borrokaldi mugagabean" dago Lander Labajo
2008ko aza. 25a, 17:15
Azaroaren 11n "borrokaldi mugagabeari" ekin zioten Aranjuezko (Madril, Espainia) espetxean diren 17 euskal preso politikoak, Uribe Kostako Amnistiaren Aldeko Mugimenduak jakinarazi duenez. Izan ere, horien artean dago Lander Labajo gazte algortarra. "Presoen bizi baldintza duinen alde borrokan" ari dira, presoek idatzi batean aipatu dutenez. Eta espetxe zuzendaritzak kasurik ez badie egiten borrokaldia gogortuko dutela adierazi dute. Honakoak eskatzen dituzte: aurrez aurrekoak asteburuetan egin ahal izatea, bisitetarako lagunen zerrendekin arazorik ez izatea, bikotekidearekin komunikatzeko eskubidea, heldutako kide berriei hil horretako aurrez aurrekoak bermatzea, nahi bezain beste gutun idazteko eskubidea, ziegatan bakarrik egoteko eskubidea eta ikasketak egin ahal izateko oztoporik ez izatea. Argazkian, Lander Labajo artxiboko irudi batean."Borrokaldia hasieran txandakakoa izango da, astelehen eta ostiral bitarteko goiz osoko txapeoak egingo ditugu moduluka, eta hau, kontzentrazio, instantzia bidalketa eta beste bitarteko batzuekin osagarrituko dugu. Segurtasun zuzendariordeari gure aldarrikapenak barnebiltzen dituen gutuna helarazi zaio ere. Gure aldarrikapenak eskuratu ez eta espetxeak neurri berri hauek aplikatzen badu moldeak gogortuko ditugu, beti ere gure helburuak lortu arte", azaldu dute idatzian Aranjuezko preso politikoek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun