Jada, 25 urte dira Dow Chemical enpresak Leioako Udal Musika Eskolako ikasle bati beka urtero ematen diola. "Bekadun horietako %90 gaur egun, musika euren profesio egin dute eta horretaz bizi dira. Hori dela-eta, beka hau oso estimatua da ikasleen artean eta estimulu oso gogorra da euren ametsa lortu ahal izateko", zehaztu dute udal arduradunek.
Raquel Gomez Ibañez
Barakaldon jaio zen 1994ko maiatzaren 9an. Leioako Udal Kontserbatorioan hasi zen 7 urterekin eta, 8 urterekin, biolina jotzen ikasten hasi zen. 2008ko ekainean Dow Chemical beka eman zioten eta, hilabete berean, “Euskadiko Musikari Gazteak” lehiaketaren II. edizioan ohorezko aipamena jaso zuen hari-tresnen modalitatean, 14 eta 16 urtera bitarteko kategorian. Udan Sergio Castro (Aragoiko Goi Mailako Musika Kontserbatorioko irakaslea) izan zuen maisu eta Nicolas Chumachencok eman zizkion eskolak. Gaur egun, Leioako Nuestra Señora de la Mercedes ikastetxean dabil DBHko 3.maila ikasten eta, aldi berean, musika prestakuntza jasotzen ari da, Miguel Angel Torres Muñoz maisuaren eskutik.
Raquel Gomez Ibañez 14 urteko neska izan da aurtengo Dow Chemical bekaren jasotzailea. Izen bereko enpresak urtero ematen dio beka hori Leioako Udal Musika Eskolako Erdi Mailako ikasle bati, eta aurten biolin joleari tokatu zaio. Jasotako ia 7.000 euroak musika ikasketak amaitzeko falta zaizkion lau urteak doan egiteko aukera emango dio Gomezi, udal leioaztarreko iturriek aipatu dutenez. Hori ospatzeko, ostegun honetan, azaroak 27, arratsaldeko 8etan, musikari profesionalak eta musikaren maitaleak batuko dira Kultur Leioako auditorioan. Bertan kontzertu bi eskainiko dira: alde batetik Raquel Gomez bekadunarena. Ondoren Leioako Orkestra Gaztea izango da taula gainean, Alberto Urretxoren tronboiaz lagunduta eta Margarita Lorenzo de Reizabalen zuzendaritzapean. Argazkian, Leioako Udal Musika Eskola.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun