Zehazki, asteburu honetan, metroaren oraingo trenbidearen eta Getxo aldean egin den behin-behineko saihesbidearen artean trenbideko elementuak konektatuko dira, geroago geltoki berria kokatuko den orubeak libratu ahal izateko, Garraio Partzuergoko iturriek azaldu dutenez. Trenbidea, katenaria, seinaleak eta komunikazio sistemak egokitzeko lanak larunbatetik astelehenera bitartean egingo dira (abenduaren 6tik 8ra). Egun horiek aukeratu dira jatorria edo helmuga Bidezabal eta Plentzia artean duten bidaiariei "ahalik eta eragozpenik gutxien sortzeko, hiru jaiegun horietan urteko bidaiari trafikorik txikiena ere izango denez gero", azaldu dutenez. Lanok trenbideko ohiko zerbitzua etenaraziko dute 1. lineako zati horretan, bi noranzkoetan, besteak beste, argindarra moztu behar delako. Trenen ordez, BGPk eta Metro Bilbaok autobus zerbitzu berezia ipiniko dute, trenen ordutegi eta maiztasun berberekin. Metroen ordezko autobusak Plentzia, Urduliz, Berango eta Bidezabalgo geltokien ondoan geratuko dira; Sopelan udaletxetik gertu dagoen Urbaso tabernaren ondoan eta Larrabasterran Iberre kalean, geltokitik gertu. Tren-autobus aldaketak Bidezabalgo geltokian egingo dira eta geltoki guztiak seinalatuta egongo dira.
Zubi honetako obrak metroaren ibilbidean dauden pasaguneen azken aurrekoa kentzeko eta Getxo udalerrian metroaren zazpigarren geltokia egiteko lanen barruan sartzen dira. 36 hilabeteko obrak eta 36 miloi euroko inbertsioak beharko dira obra horiek finkatzeko. Eusko Trenbide Sarea iazko ekainetik ari da zati horren gainean lanean; 1.250 metro luze ditu guztira eta metroaren beste geltoki bat hartuko du, lurrazalean (oraindik izenik gabe), eta 300 tokiko aparkalekua ere lotuko zaio.
Faseak
Eraikuntza proiektuak hainbat fase ditu. Getxo aldeko geltoki berria izango da egitasmoko lehenengo ekintza. Bidezabaleko geltokiaren ondoan dagoen trenbide gurutzea, Metro Bilbao ustiatzeko eta 1. lineako San Inazio-Bidezabal tartean bost minutuko maiztasunak eskaini ahal izateko ezinbestekoa, Andra Marin egongo den geltoki berrira eroango da.
Geltoki berriak hiru trenbide izango ditu trenen mugimenduak errazteko, baita 300 auto inguru sartzeko besteko aparkalekua ere. Izan ere, datozen egunotan egingo diren obrekin lurzoruak libratuko dira geltoki berria egiten hasteko. Ondoren, behin-behineko saihesbidea Maidaganen eta lurperatzeko lanak egingo dira, geltoki berria amaitu eta gero hain zuzen. Trenbide bakarra ipiniko da, oraingo bidearen parez pare, eskoramendua eta lurperatzea bideratzeko.
Azkenik, amaierako urbanizazioa burutuko da. Metro Bilbaoren trenbideak estalita geratuko dira 300 bat metroko luzeran, eta kanpoaldea urbanizatu egingo da auzokoek erabiltzeko.
Bizkaiko Garraio Partzuergoak (BGP) iragarri duenez, Metro Bilbaoren Bidezabal eta Plentziako geltokien artean trenik ez da ibiliko, abenduaren 6tik 8ra bitartean. Metroaren ordez autobusak ibiliko dira ordutegi eta maiztasun berberekin. Izan ere, Bidezabal eta Berango artean geltoki berria egiteko lanetan dabiltza; eta Maidagan kaleko trenbide-pasagunea ere lurperatuko dute. Horren harira, azaroaren 28ko osoko bilkuran, Maidagango pasonibela lurperatzeko lanen gaineko batzorde berezia eratzea onartu zuen Getxoko Udalbatzak, PSE-EE eta PPren aldeko botoekin. Auzokideak "kalbarioa" sufritzen ari direla salatu zuten konstituzionalistek. EAJk eta Ezker Batuak, ordea, kontra bozkatu zuten, horretarako Hirigintza Batzordea dagoela eta bertara "auzokideak ere parte hartzera gonbidatu" daitezkeela argudiatuta. Gainera, udal taldeek aurkeztutako mozioak "asmo adierazpentzat" baino ez ditu tokiko gobernuak, horiek exekutatzeko ardura eurena delako. Horretaz gain, Bidezabalen Metro Bilbaoren arreta bulegoa egon badagoela eta "metroa Udalaren gaia ez" dela adierazi zuten EAJk eta EBk. Argazkian, auzokideek Getxoko PSE-EEri helarazitako irudian, hainbat gazte obren inguruan jolasten, "horrek dakarren arriskuarekin".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun