Inazio Uria Mendizabal, Altuna y Uria enpresako arduradunetako bat, tirokatu eta hil egin dute gaur eguerdian Azpeitian. DYAk baieztatu du heriotza, 13:52an. 13:03an izan da atentatua eta osasun zerbitzuek bertan artatu dute; 40 bat minutura utzi diote biziberritze lanei. Gertaera ezagutarazi bezain laster, albiste agentzia eta hedabide gehienek ETAri egotzi diote atentatuaren egiletza, Eusko Jaurlaritzaren Herrizaingo Sailaren iturriek aipatuz. Bi lagunek bi tiro eman dizkiote Uriari: bat buruan eta bestea bularrean. 71 urte zituen eta azpeitiarra zen. Ez zeraman bizkartzainik. 1969an sortu zuten Altuna y Uria enpresa, eta etxeen eraikuntzan eta herri lanetan egiten du behar. Egun AHTren Euskal Y-ren eraikitzaile nagusietako bat da. Argazkian, osasun zerbitzuak Uria artatzen, tiroketa izan den tokian bertan / Urola Kostako Hitza.
Azpeitiko eraikuntza enpresako egoitzatik irten eta auto batean zela jaso ditu tiroak Inazio Uria Mendizabalek, DYAk jakinarazi duenez. Loiola auzoan izan da gertaera, Kiruri jatetxe ondoan. Ordu horretan Kiruri jatetxera joaten den, jokoan egitera, jatetxeko kide batek esan duenez. Forentseak 15:35ean eman du Inazio Uriaren gorpua altxatzeko agindua, Donostiara eramateko. Ertzaintzak esan duenez, atentatu egileek erabili duten autoko jabea Itziarko (Deba, Gipuzkoa) gainean topatu dute, eskuak lotuta. Besteak beste, Juan Jose Ibarretxe Araba, Bizkaia eta Gipuzkoako lehendakaria, Markel Olano Gipuzkoako ahaldun nagusia eta Adegi-ko ordezkariak hurbildu dira Azpeitiara, atentatuaren berri izan eta gutxira. Jose Luis Rodriguez Zapatero Espainiako Gobernuko presidentea Euskal Herrira zen etortzekoa, ekitaldi batzuetara, baina horiek bertan behera uztea erabaki du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun