Euskal Herriko Unibertsitateko Errektoretzarako atzoko hauteskundeak irabazi ostean, "zoriontsu" agertu da gaur Iñaki Goirizelaia Ingeniaritza Telematikoan katedraduna, Radio Euskadin egin dioten elkarrizketan. Besteak beste, izandako parte hartzearekin "pozik" dago errektore berria. Unibertsitateko datuen arabera, 5.416 boto eta bozka haztatuaren %52,25 jaso du Goirizelaiak eta 4.350 boto eta %47,75 Marisol Esteban Ekonomia Aplikatuan katedradunak. Guztira, 52.236 lagun zeuden bozkatzera deituak. Ildo horretan, gehienbat ikasleen artean izan da nagusia abstentzioaren hautua, errektore berria aukeratzeko orduan: 45.553 neska-mutiletatik 5.216k baino ez zuten bozkatu atzokoan, ikaslegoaren %11,5 baino gutxiago. Gogoratu, ikasleek Klaustroko eta ikastegietako batzarretarako ordezkariak ere hautatu behar zituztela. Bost ikastegitan, berriz, Klaustrorako irakasleen ordezkariak aukeratu behar ziren, eta fakultate eta eskola askotan Ikastegiko Batzarra. Hala ere, horren gaineko daturik ez du oraindik eman EHUk. Bitartean, Goirizelaiak "denen errektore" izateko lan egingo du adierazi du. Horretarako, "parte-hartzea bultzatu" nahi du eta, horrenbestez, bere egitekoa "jendeari entzutea eta, ondoren, erantzutea" izango da, bere hitzetan. Abenduaren 12ra arte epea dago emaitzak inpugnatzeko eta hilaren 15ean emango dira behin betiko emaitzak. Urtarrilaren amaiera aldera, Juan Jose Ibarretxe EAEko lehendakariak izendatuko du errektore berria Ajuria Enean. Argazkian, Goirizelaia eta Perez Iglesias, beste klaustrokide batzuekin, aurreko batzar batean.
Iñaki Goirizelaiak urtarrilean ekingo dio Euskal Herriko Unibertsitateko (EHU) errektore karguari, atzoko hauteskundeetan Marisol Estebani irabazi ostean. Atzo bezala gaur ere, Ignazio Perez Iglesias orain arte EHUko errektore izandakoari eskaini dio garaipena, orain arte kritika asko jaso dituelako, "merezi ez zituen kritikak", Goirizelaiaren aburuz. Radio Euskadin egindako elkarrizketan nabarmendu duenez, bere proiektua "parte-hartzean, elkarrizketan eta adostasunean" oinarrituko da. Bolonia prozesuari buruz ere hitz egin du: "Ondo prestatuta gaude eta erronka horri erantzuna ematen jakingo dugu". Alabaina, 2010erako zehaztuta izan behar diren titulazioei dagokienez, zenbait kasutan epeak beteko ez dituztela onartu du. Bestalde, Inazio Uriaren kontrako atentatua ere izan du hizpide. "Proiektu guztiak dira eztabaidagarriak, baina inork ezin du bestearen bizitzari buruz erabakirik hartu", azpimarratu du. "Gaitzetsi beharreko gertakaria da. Ezin dut ulertu jazotakoa", erantsi du Goirizelaiak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun