Gaur hasi den kanpaina Euskadi 2007-2010 Bide Segurtasuneko Plan Estrategikoaren barruan bilduta dago. Plan horretan Eusko Jaurlaritzak, foru aldundiek, udalek eta trafikoarekin nolabaiteko zerikusia duten beste hainbat erakunde pribatuk hartzen dute parte. Kanpainak irauten duen bitartean Herrizaingo Sailak hainbat mezu zabalduko ditu hedabide ezberdinetan, alkohola edanda edo drogak kontsumitu eta gero autoa hartzeak dakartzan arriskuez gidariak jakitun izan daitezen. Ertzaintza 2007ko azaroan hasi zen prebentzio frogetan, istripuen ikerketetan eta arau-hauste larrietan droga kontrolak ere egiten.
10.912 alkoholemia proba eta drogak neurtzeko 240 proba
Herrizaingo Sailaren datuen arabera, aurten Araba, Bizkaia eta Gipuzkoako errepideetan burutu diren aipatutako bi kanpainetan guztira, 10.912 alkoholemia proba egin dituzte 809 kontroletan: 517 ekaineko kanpainan eta beste 292 abuztuko jaietan zehar. 389 izan ziren positibo eman zuten gidariak, hauetatik 230ek lehen saiakeran eta 159k bigarrenean. Guztietatik 29 kasutan atxilotu zituzten positibo eman zuten gidariak. Era berean, alkoholemia kontrol horiekin batera, Ertzaintzako agenteek eta Bilboko udaltzainek drogak neurtzeko kontrolak burutu zituzten kanpaina berberetan. Guztira 240 proba egin zituzten eta hauetatik 43 salatu zituzten sustantzia sorgorkariak hartu ostean gidatzea egotzita.
Gidarien artean alkoholemia eta droga kontrolak egiten dabiltza Getxo eta Leioako udaltzainak
Ertzaintzaz gain, hainbat udalerri eta hirietako tokiko poliziek jarri dute martxan, gaur, alkoholemia eta drogen zainketa eta kontrol kanpaina. Basauri, Irun, Bilbo, Donostia eta Gasteizen ez ezik, Getxo eta Leioan ere kontrolak egingo dituzte kale eta errepideetan udaltzainek, urtarrilaren 4ra bitartean. Gabon garaia tartean dela aprobetxatuz, gidariak arriskuez jabetzea eta horrela trafiko istripuak ekiditea izango du helburu kanpaina horrek, Eusko Jaurlaritzaren Herrizaingo Sailaren arabera. Datozen lau asteotan errepideetan alkoholemia eta droga kontrolak areagotzean oinarrituko da ekimena. Horrekin, baldintza ez-egokietan autoa hartu duten gidariak atzeman eta istripu kopurua jaistea espero da, batez ere, Gabonak berton ditugula kontuan hartuta. Polizia agenteek asteko egun guztietan eta edozein ordutan burutuko dituzte aipatutako zainketak eta kontrolak. Asteburuetan eta jai egunetan, gainera, areagotu egingo dituzte, batez ere, gauez. 2008an zehar martxan jarri den hirugarren kanpaina da. Aurreko biak uda aldera izan ziren: lehena ekainaren 2tik 15era eta, bigarrena, abuztuan, zehazki, hiru hiriburuetako bakoitzeko jaietan zehar. Argazkian, Ertzaintzaren trafiko kontrola.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun