Esparru ugaritan lan handia egin da, baina euskararen garapena nahi baino mantsoago ari da gertatzen. Egoera horren aurrean, Euskaraz bai esateko momentua dela ikusten dugu. Euskararen alde egotea ez da nahikoa, konpromisoak areagotu egin behar dira eta pauso bat harago joan, hitz bitan, euskara ikasi eta erabili, Euskaraz bai aldarrikatuz.
Hasteko, euskararen berreskurapen-prozesua azkartzea ezinbestekoa da. Ezagutza eta erabilera zabaltzeko aukera berriak sortzen jarraitu behar dugu. Bigarrenik, ezinbestekoa da funtzio sozial ahalik eta gehien euskaraz garatzeko aukera lehenbailehen lortzea. Hirugarrenik, euskara lehentasuneko hizkuntza izatea lortu behar dugu, horrela euskaldunen eta biztanle guztien hizkuntza eskubideak bermaturik izateko. Laugarrenik, hori guztia burutzeko lan politiko-instituzionala eta lan soziala bideratu behar dira, biak ere norabide berean. Erakunde instituzionalek, eragile politikoek, ekonomikoek eta sozialek, norbanakoek eta euskalgintzak norabide berean lan egitea ezinbestekoa da, guztion arteko lankidetzak soilik ziurta baitezake euskararen geroa eta Euskal Herri euskalduna.
Asko egin dugu, baina asko dago egiteko. Euskararen berreskurapen prozesua azkartu eta normalizazio osoa lortzeko urrats sendoak egin behar ditugu, pauso bat harago joan. Hori dela eta, ekitaldi ikusgarria burutzea espero dugu abenduaren 13an, Barakaldoko BECen. Euskaltzale guztiak zaudete gonbidatuta, hainbat esparrutan milaka herritarrek eta entitatek egindako lana aitortu eta bultzada berri baten beharra azpimarratzeko.
Euskararen normalizazioan aurrera egin behar dela uste dugunontzat hitzordu garrantzitsua izango da, huts egin ezineko topaketa. Bertan, euskalgintzaren bilgune den Kontseiluak hamar urtetan egin duenaren errepasoa egin eta etorkizuneko lanaren oinarriak aurkeztuko ditugu. Euskarak bultzada berria behar duelako, pauso bat harago joan behar dugulako, Euskaraz bai esateko ordua iritsi delako, abenduaren 13an, denok BECera!
1997ko abenduaren 6an sortu zen Kontseilua, Durangon. Handik denbora gutxira, Bai euskarari kanpaina arrakastatsua jarri zuen martxan, herritarren, eragileen eta instituzioen aldetik berebiziko babesa jaso zuen ekimena. 1998ko abenduaren 26an, Euskal Herriko bost kirol estadio beteta, une gorena bizi izan zuen ekimenak, 125.000 herritarren parte-hartzearekin. Hala ere, ez zen mota horretako lehen ekitaldia izan, 1978an San Mamesen burututako Bai euskarari ekitaldia horren lekuko. Kontseiluaren sorreratik hamar urte luze pasatu dira. Bide honetan, Kontseiluaren mezua konpromisoarekin indartu da. Konpromiso sozial, politiko, zein norbanakoena. Konpromisoa eskatu diegu norbanakoei euskaraz bizitzeko hautua dezaten (ikasi, erabili, kontsumitu, exijitu...); konpromisoa eskatu diegu eragile sozialei, euskaldundu eta euskaraz funtzionatzeko hautua egin dezaten (Bai Euskarari Ziurtagiria) eta, era berean, konpromiso politikoa eskatu dugu hizkuntza-politika egokitu, plan zehatzak egin eta behar diren baliabideak jartzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun