Hain zuzen ere, gainontzeko atxilotuen egoera ahaztu gabe -Algortarra ere badugu Aitor Artetxe-, Egurrolak, Ladislaok eta Gutierrezek "Guardia Zibilaren eskutietan izan dezaketen tratuaz" kezkatuta dago Amnistiaren Aldeko Mugimendua. "Errealitatea da torturatu egingo dituztela", adierazi dutenez. Bitartean, "borrokarako" eta egunotako mobilizazioetan parte hartzeko deia luzatu dute. Bestalde, hainbat hedabidetan agertutako informazioa gezurtatuz, atxilotutako uribekostarren etxeetan miaketarik ez dela egon aipatu du errepresioaren aurkako erakundeak.
Besteak beste, Koska irratiak zabaldu ditu AAMk Leioako manifestazioaren bukaeran egindako adierazpenak. Irakurleak hemen ditu entzungai.
Algortan 450 lagun inguruk eta Leioan beste 200 bat herritarrek salatu dituzte, Frantzian eta Espainian atzo gertatutako atxiloketak. Hain zuzen ere, iluntzeko 8etan, aurreneko protesta hasi baino lehenago botatako hitzen bidez baieztatu du Amnistiaren Aldeko Mugimenduak (AAM), bart Irunen atzemandako lagunak Ibai Egurrola eta Amets Ladislao algortarrak eta Javier Gutierrez leioaztarra direla. Guardia Zibilak berak deitu die gaur etxekoei, horren berri emanez, errepresioaren kontrako mugimenduak adierazi duenez. Hiru lagun horiek ostiralera arte inkomunikatuta izango dituzte ere esan diete. Bestalde, Aitzol Iriondo eta Eneko Zarrabeitiarekin batera, Frantziako Poliziak atxilotutako Aitor Artetxe algortarra Baionako polizia etxean jarraitzen omen du. Seirei ETAko kide izatea leporatzen diete. Eta atxiloketa gehiago egotea ez dute baztertu segurtasun indarrek. Bada, inkomunikazio egoera eta "tortura arriskua" iraun bitartean, mobilizazioak egiten jarraituko du AAMk, 20:00etan, Algortako Telletxe plazan eta Leioako Boulevardean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun