"El Mundo" egunkariaren arabera, eta beti Guardia Zibilak emandako ustezko datuak erabiliz, Irunen atxilotutakoak ETA "erakunde terroristaren kide 'legalak', fitxatu gabekoak, dira", nahiz eta ondoren "ustezko" kideak liratekeela argitzen du Madrilgo egunkariak. Era berean, aurrekaririk ez dutela aipatu eta Egurrola Eusko Abertzale Ekintzak Getxon aurkeztu zuen udal hauteskundeetako zerrendan ageri zela azpimarratu du, 23. lekuan bazihoan ere. Iturri beretik aipatu dute "atxiloketa gehiago izatea ez dela baztertzen".
Bestalde, Michele Alliot-Marie Frantziako Barne ministroak bat etorri da Madrilek emandako bertsioarekin, eta Aitor Artetxe, Aitzol Iriondo eta Eneko Zarrabeitia Gerde herriko plazan atxilotzean "auto batek ihes egin zuela baieztatu genuen eta auto horrek, Espainian geldiarazi zutena, atxiloketak ahalbidetu zituen" Irunen, esan du.
Bertsio ofizialarekin jarraituz, hiru atxilotuek ustezko Bizkaia Komandoaren aurkako operaziotik ihes egin ei zuen Aitor Artetxe bere laguna mugaren bestaldera eraman zuten Iriondo eta Zarrabeitiarekin zeukan hitzordura hurbiltzeko. Hitzordu hori baliatu behar omen zuen Artetxek Frantzian klandestinitatera sartzeko. Horren arabera, Artetxe Bizkaian egon zen ezkutuan azken sei hilabetetan eta Guardia Zibilak dagoeneko Irunen atxilotutakoen baten bati leporatu dio Artetxe etxean gorde izana, baina oraindik ez du zehaztu nori. Era berean, ez dute aipatu Artetxe non egon den eta "ikertzen" ari direla azaldu dute hainbat komunikabideri egindako filtrazioen bidez. Bitartean, hiru atxilotuak ETAren buruzagitzarekin komunikazioan jarri eta muga igarotzeko txangoa antolatu zutela aipatzen du bertsio ofizialak.
Guardia Zibilak, gutxienez, lau etxebizitza arakatu ditu bart eskualdean. Izan ere, Ibai Egurrola "Egus", Amets Ladislao eta Javier Gutierrez "Guti" Madrildik ekarri eta Algortako Bizkerre eta Zulueta eta Leioako Ikea Mendi kaleetako beren etxeetara eraman dituzte miaketen lekukoak izan daitezen. Era berean, Ladislao Berangora eraman dute bertako elizaren inguruan beste etxebizitza bat ikuskatzeko, albiste-agentziek jakinarazi dutenez. Miaketa horietatik guardia zibilek hainbat kutxa eta poltsa eraman dute. "El Mundo" egunkariaren arabera hainbat dokumentazio egongo litzateke barruan. Besteak beste, Egurrolaren kasuan goizaldeko 4ak arte luzatu da miaketa. Amnistiaren Aldeko Mugimenduak adierazi duenez, gurasoak etxean zeuden eta aterarazi egin zituzten euren semea sartzeko. Ez zuten elkar ikusteko aukerarik eduki. Egurrola, Ladislao eta Gutierrez pasa den astelehenean gauean atxilotu zituzten Irunen, Espainiako Barne Ministerioak emandako bertsio ofizialaren arabera. Bertsio horren arabera, hirurak Aitor Artetxe, Aitzol Iriondo eta Eneko Zarrabeitia ustezko etakideak atxilotzeko operaziotik ihes egiten lortu zuten. Atxiloketa horiek astelehenean ere izan ziren Pirinio Garaien departamentuan, 18:00etan. Bestalde, AAMk mobilizazioak deitu ditu egunero atxilotuak inkomunikazio egoeran jarraitzen duten bitartean. Ekimenak 20:00etan izango dira Leioako Boulevard-ean eta Algortako Telletxen. Argazkian, atzo Telletxen egindako manifestazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun