Igande honetan, baserri giroan murgilduko da Leioako erdigunea, bertan egingo baita Nekazaritza eta Abeltzaintza XXI. Azoka. Guztira nekazaritzako 114 erakustoki izango dira kalean, eta 25 abeltzainek 80 abelburu aurkeztuko dituzte. Berrikuntza modura eta, Bizkaian lehendabiziko aldiz, aurten, Mungialde zein Txorierriko indabak dastatuko ahal izango dira. Goizeko 10:00etan zabalduko dute azoka. Horrekin batera, 11:00etatik 15:00etara, hainbat ekintza izango dira Errekalde plazan txiki zein handien gozamenerako. Besteak beste, trikitilariak, haurrentzako talo eta txalaparta tailerrak, poneyak eta herri kirolen erakustaldia egongo dira bertan. Abereak, berriz, banatuta egongo dira herriko hainbat tokitan zehar. Errekalde plazan zaldiak, ahuntzak eta hegaztiak izango dira; eta Boulevardean, behia eta idiak. Bestetik, produktuen dastatzea, salmenta eta erakusketa hainbat txokotan izango da: Jose Ramon Aketxe plazan, Boulevardean eta Errekalde plazan, hurrenez hurren. Leioa Kirol Zaleak taldeko kide Guillermo Bilbaok adierazi zuen bezala, aurtengo abelburu ikusgarriena 1.300 kilo inguru dituen zezena izango da. Animalia Sopuertako abeltzain batena da eta aurten Zamudioko lehiaketako irabazlea suertatu da. Azkenik, nekazal tresneriaren erakusketa eta produktu ugarien salmenta zein dastatzea izango dira. Horien artean, pateak, txerrikiak, ogia, eztia, ortuariak, landareak, txakolina, sagardoa eta gazta. Argazkian, azoka iragartzeko kartela.
Esan bezala, nekazaritza eta abeltzaintzaz gain, hainbat ekintza eta arlo desberdin biltzen ditu Leioako azokak. Euskal ohiturak eta kultura toki garrantzitsua daukate, udal arduradunen hitzetan. Gauzak horrela, txalapartariek eta trikitilariek giroa alaituko dute 11:00etatik aurrera. 11:30ean harri jasotzaileak izango dira Errekalde plazan. 12:00etan, berriz, Mungialde eta Txorierriko indabak dastatzeko txanda izango da, eta 13:00etan, Boulevardean behi eta idi arraza desberdinetako argibideak entzuteko aukera egongo da. Bestalde, 14:00etan, Leioako nekazari guztiei egingo diete omenaldia. Eta horrekin batera, “Leioa Elizateko Udala” Idiazabal Gazta Jatorrizko Izendapenaren Bizkaitar Produktoreentzako X. Lehiaketaren sari banaketa egingo da, baita postuen eta partaideen girotze lehiaketarena ere. 15:00etan itxiko ditu ateak azokak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun