Beste urte batez, Sahararen aldeko euskal karabanarekin bat egin du Gorlizko Udalak, "Piztu itxaropena" leloari eutsiz. Horrenbestez, elikagaiak (azukrea, atuna eta hegaluzea oliotan, arroza, pasta eta lekaleak) eta higiene-gaiak (konpresak) batzen hasi dira jada. Horiek urtarrilaren 23ra arte eraman ahal izango dira kultur etxera (Ibarrena etxea, Krutzeta kalea 5), edo udaletxeko bulegoetara (beheko solairuko harrera gelan). Bitartean, Itzubaltzeta / Romoko supermerkatuetan ostiral eta larunbatean egingo dute bilketa. Besteak beste, Kresaltxu kaleko Simply Romo (Sabeco) eta BM Romo, Serantes kaleko Eroski Romo eta Pinuetako Eroski dendek batuko dituzte Sahararako elikagaiak eta higiene-gaiak. Ordutegiari dagokionez, bihar, 17:00etatik 21:00etara izango da; eta etzi 9:00etatik 14:00etara. Diruz lagundu nahi dutenek, berriz, ondoko Euskadiko Kutxaren kontu zenbakian egin dezakete: 3035-0080-94-0800054177. Argazkian, Saharar Errepublika Demokratikoaren (SEAD) aldarrikapenaren 30. urteurrenarekin bat eginez, bandera sahararra jaso zuten ikurrinarekin batera Gorlizko udaletxean, 2006ko otsailaren 27an.
Fronte Polisarioak EAEn duen ordezkaritzak eskatutakoari jarraituz dago martxan Sahararen Aldeko V. Euskal Karabana. Ekimena Saharar Herriarekiko Elkartasunerako Euskal Elkarteek antolatu dute, “Bakea Saharan” Euskal Legebiltzarreko talde-artekoa eta Euskal Fondoaren Sahararako Koordinazio Unitatearen laguntzarekin. "Elkartasun kanpaina honen helburu nagusia janaria helaraztea da, ahal den neurrian, Tindoufeko (Aljeria) saharar errefuxiatuak jaki aldetik pairatzen ari diren krisialdia nolabait arintzeko", azaldu dute udal arduradun gorliztarrek. 2001eko martxoan Saharako Güera herriarekin senidetu zenetik, hainbat ekimenetan hartu du parte Gorlizko Udalak, saharar herriari laguntza emateko. "Hango herritarrak bidegabeko erbestean bizi dira azken 30 urteetan, Aljeriako Saharako basamortu latzean", azaldu dute tokiko agintariek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun