Gutxienez Algortan, Urgull eta Illeta kalean miaketa bana egiten jarraitzen du, oraindik orain, Guardia Zibilak. Lehenengo horretara, 20:00etako manifestazioa hasi eta ordu erdi eskasera heldu dira poliziak. Eta protestan batutako 320 bat lagunetatik askok horien kontrako oihuak bota dituzte manifestazioa Urgull kale paretik igaro denean. Hala ere, inork ez du asmatu bertan zer egiten dabiltzan esaten. Illetan, berriz, Bidebarri eta Salsidu kaleen arteko zatia moztu du Guardia Zibilak, Marimertxe Alcocerren pisua miatzeko. Andra bertara nola eramaten zuten ikusi dute hainbat lekukok. Azkenik, Berangon, bila dabiltzan Andoni Elkanoren etxera joan dira poliziak. Bitartean, Illeta kalean, dozenaka lagun batu dira, manifestazioaren ostean, Alcocer eta gainontzeko atxilotuei elkartasuna adierazteko. Bihar ere mobilizazioa izango da 20:00etan Telletxen. Argazkian, 450 lagun inguruk egin zuten manifestazioa asteartean Algortan.
Atzo, antza, Elkanoren bila joan zen Guardia Zibila, Algortako Portu Zaharreko etxebizitza batera. Bertan erroldatuta ei dago gaztea, baina orain beste mutil bat bizi da bertan. Amnistiaren Aldeko Mugimenduak (AAM) salatu duenez, poliziek "atea behera bota eta egungo maizterra paretaren kontra jarri zuten". Bestalde, bila dabiltzan Julen Larrinaga eta Oihana Lekunberriren etxeetan ere egon ziren atzokoan guardia zibilak. Lehenengoan, 22:00etan hasi eta goizaldeko 4ak arte luzatu zen miaketa. Atxilotuta jarraitzen duten lagunen inguruan informazio berria ematerik ez du izan AAMk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun