Leioako alkateari “une honetan herritar bat torturak jasaten egotea berdin diola” salatu du Ezker Abertzaleak
Ibai Egurrola eta Amets Ladislao algortarrekin batera, Jabier Gutierrez "Guti" leioaztarra atxilotu zuen astelehen gauean Guardia Zibilak. Leioako Ezker Abertzaleak jakinarazi duenez, horren bi lagun Eneko Arruebarrena alkatearengana joan dira gaur goizean, "bere egoera zein den jakitearren, bitarteko instituzionalak erabiliz informazioa lortzen ahalegindu zedin". Gaineratu dutenez, "bere gustukoak izan edo ez, leioaztar guztion ongizatea bere ardura da". Izan ere, Gutierrez inkomunikatuta jarraitzen du, "horrek dakarren torturatua izateko arriskuarekin", nahiz eta tortura ekiditeko protokoloa aplikatzen ari zaizkion. Udal agintariak, baina, "ezer egiteko prest ez dagoela" esan die eta "bulegotik bota" ditu, salatu dutenez. Hori dela eta, "PSOEk torturatzen duen bitartean", Arruebarrena berari eta EAJ, Ezker Batua eta Aralarren udal gobernuari "horretan laguntzea" egotzi die Leioako Ezker Abertzaleak. Bitartean, 150 lagun inguru batu da gaur iluntzean, Boulevardetik abiatu den manifestazioan. Bihar ere 20:00etarako egin dute deialdia. Eta igandean, Kultur Leioa aurrean elkartuko dira, eguerdiko ordu batetan. Izan ere, egun horretan nekazaritza eta abeltzaintza azoka dago Leioan. Argazkian, Leioako Ezker Abertzalea prentsaurreko bat ematen / Gaztesarea.
Gutierrezen egoeraz ez arduratzeagatik, "lehenengo eta bigarren mailako herritarren artean" bereiztea leporatu die Eneko Arruebarrena alkateari eta EAJ, Ezker Batua eta Aralarren udal gobernuari Leioako Ezker Abertzaleak. Horretaz gain, "Guardia zibilari, astelehen gauean, herritik nahi bezala ibiltzeko aukera (kaleak moztuz, herritarrak mehatxatuz eta beldurtuz, leioaztarrak beren armekin arriskuan jarriz…) ematea" egotzi diete. Horretaz gain, Leioako Udalaren "izaera ez demokratikoa" salatu nahi dute, indar politikoen aurkako apartheid-az gain, herritarren kontrako baztertze sistematikoa ere egiten duelako".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun