Getxoko Udaltzaingoak segurtasun kanpaina berezia abiatuko du Gabonetan, udalerriko dendetan eta horietako bezeroen artean, ahal den neurrian, lapurretak ekiditeko asmoz, tokiko poliziaren buruzagiek aditzera eman dutenez. Kanpaina astelehenetik urtarrilaren 6ra arte egingo da. Ekintza hori, Udaltzaingoaren burua den zinegotzi Kepa Miñambresek nabarmendu duenez, "Getxo Enpresa eta Merkataritza salerosle elkartearekin dagoen etengabeko lankidetzaren harira dator, arazo honen inguruan merkatarien asmo eta beharrak entzun eta gero". Uniformez jantzitakoez gain, beste zortzi udaltzain ibiliko dira kalez jantzita, bi txandatan banatuta, goiz eta arratsaldez, astelehenetik ostiralera arte. Udalerriko merkataritza-gune garrantzitsuenak zainduko dituzte, Algorta, Itzubaltzeta / Romo eta Areeta aldean; lapurrek dendetako materialeak, bezeroen diru zorroak, eta abar ostu ez ditzaten. Azkenik, zerbitzua Ertzaintzarekin koordinatuko dela aipatu dute, "bi erakundeetako poliziek aldi berean leku berdinak zaintzea saihestu aldera", Miñambresen arabera. Argazkian, Getxoko udaltzain bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun