Sektore politiko batzuk, ordea, menpeko hizkuntz politikak azalez berritu nahi dituzte, mamian ezer alda ez dezan. Horrela, herritarren gogoa, euskararen beharrak, eta Euskal Herri euskalduna baztertu nahi dituzte.
Ezker abertzalearentzat, berriz, nahitaezkoa da hizkuntza politika berria eta gutxieneko oinarri hauek izan behar ditu:
• Euskararen berreskurapen osoa izango du helburu, lurralde guztian eta funtzio denetan.
• Hizkuntz politika nazionala, burujabea eta bakarra izango da, baina malgua eta orokorra.
• Euskara Euskal Herriko hizkuntza nazionala, berezkoa eta lehentasunezkoa dela onartuko du.
• Euskara eta euskal identitate eta kultura bereiztezinak direla onartuko du.
• Euskararen Lege Berriak euskal herritarron hizkuntz eskubide indibidual eta kolektiboak bermatu, eta hizkuntz politikaren gauzapena arautuko ditu.
Helburu horrekin, ezinbestekoa da euskalgintzak urteetan egin duen ahaleginean sakontzea eta eragina biderkatzea. Eta euskalgintzak jauzi kualitatiboa proposatzen du: pauso bat harago ematea Euskaraz bai aldarrikatzeko.
Ezker abertzaleak ere bere erantzukizunari aurre egingo dio. Zailtasunak zailtasun, Euskal Herri euskaldunaren bidean gure konpromisoa eguneratu eta berresten dugu. Horregatik, ezkertiar eta abertzale guztiok datorren larunbatean, BEC-en dugu hitzordua. Kontseilua, eragile eta euskaltzaleekin auzolanean, Euskal Herri euskalduna berreraikitzera goaz.
Euskarak aldaketa behar du. Euskal Herria bezala, une erabakigarrian aurkitzen da. Azken hamarkadetan, hilzorian zegoen euskarari bizi-hatsa eman diogu euskalgintzatik, eragile eta herritarren ekimenez. Baina lan eskerga horren eragina marko juridiko-politikoen mugek eta menpeko hizkuntz politiken bultzada eskasak neutralizatu dute. Euskal Herri euskalduna lortzeko ezinbestekoa da euskara berreskuratzeko prozesua beste parametro batzuetan kokatzea. Euskararen hizkuntza komunitatea ukatua, zatitua eta desegituratua dago; hizkuntza eskubideen urraketa sistematikoa da; euskararen lege onarpena kasurik onenean bigarren mailakoa da, ofizialkidetasunak menpekotasuna ezkutatzen du; belaunaldi berrietan soilik heren bat euskalduntzen da; euskararen ezagutzaren igoera moteltzen ari da; baldintza hauetan erabilera areagotzea ezinezkoa da. EAJren eta PSE/PSNren hizkuntza politikak enbor bereko ezpalak dira, eta, UPNren eta UMPren politikak enbor horretako adarrak: euskara desagertzeko eta euskara menderatzeko politikek ez dute balio. Hizkuntz politikak aldatzeko garaia da. Argazkia: ezkerabertzalea.info.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun