Euskal selekzioaren ofizialtasunaren aldeko manifestazioa izango da abenduaren 27an Bilbon
Esaitek, Euskal Selekzioen Aldeko Iritzi Taldeak, eta gizarteko beste 27 kolektibok abenduaren 27rako manifestazioa deitu dute Bilbon. 17:30ean abiatuko da Aita Donostia plazatik. Martxari babesa eman diotenen artean, ELA, LAB eta EILAS sindikatuak, Etxerat, Ahaztuak 1936-1977, Bai Euskal Herriari, Amnistiaren Aldeko Mugimendua, Bilgune Feminista, Eguzki edota Herria 2000 Eliza daude. Manifestazioaren xedea nazioarteko lehiaketetan parte hartzeko Euskal Herriak duen "eskubidea" galdegitea da. Bitartean, bihar, “Euskal Herria, nazio bat, selekzio bat, federazio bat” apustuarekin bat egiten duten kirolari eta herritarrekin argazkiak aterako dituzte Uribe Kosta eta Erandion. Lau dira jarritako hitzorduak, abenduaren 13an, larunbatarekin, guztiak: 12:00etan, Itzubaltzeta / Romoko Santa Eugenia plazan; 12:30ean, Leioako Boulevardean; eta 13:00etan, Erandioko metro geltokiko zabalgunean eta Algortako Txiki eta Otaegi plazan. Ekimenari atxikimendua adieraztea ez ezik, argazkiak ateratzeko egindako deialdietan parte hartzea ere eskatu diete kirolariei, eta oro har herritar guztiei antolatzaileek. Argazkian, iaz Algortan batutako lagunak / Nazio bat, selekzio bat.
Euskadiko Futbol Federazioak (EFE) abenduaren 23ko Iranen aurkako partidan "Euskadi" izendapena erabiltzeko erabakiaren aurrean, Euskal Herriko 165 futbolari eta jokalari ohiek adierazpen bateratua plazaratu zuten azaroaren 13an. "Iaz hartutako konpromisoari eutsi" eta Euskal Herriaren izenean ez bada, norgehiagoka horretara ez direla agertuko iragarri zuten. Gainera, abenduaren 3an, Euskal Herriko 800 kirolarik baino gehiagok bat egin zuten futbolariekin. Euskadi ala Euskal Herria, "arazoa ez da izenaren ingurukoa soilik", Esait eta Bai Euskal Herriari eragileen ustez. Euren hitzetan, "haratago doa, izebergaren punta bakarrik erakusten digute komunikabideetatik". "Euskal kirolariek Euskal Herria ordezkatzeko duten eskubidea, ofizialki eta nazioartean praktikan jarri ahal izatea da eskatzen duguna kirolariek eta herritarrok. Baina horretarako oinarria falta da. Euskal Herriko kirolari guztiak bilduko dituzten eta Euskal Herri osoan jardungo duten federazio nazionalak falta dira. Nazioa garelako aldarrikatzen dugu selekzio propioa izateko eskubidea, federazio nazionalek antolatu beharko lituzkete selekzioak, horretarako Euskal Herri osoko kirolariak kontutan hartuta. Euskal Herria Izenari eta izanari eutsi behar diogu", azaldu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun