Joseba Arregi Hirigintzako zinegotziak momentu honetatik aurrera aurreikusitako epeak azaldu ditu. “Aste honen amaierarako, eraikina guztiz eraitsita eta orubea garbi eta hesituta geldituko dira. Bestalde, abenduko udal batzarrean hondeatzeko lanen lizitazio-prozesua hasteko proposamena aurkeztuko dugu. Obra horien aurrekontua sei milioi euro baino handiagoa denez, Europako Komunitateen Aldizkarian argitaratu beharko da eta, prozesu hori ez bada atzeratzen, espero dugu lanak 2009ko udaberrian hasi ahal izatea”. 2010ean ondorengo lizitazioak egingo dira eraikina eraikitzeko fase ezberdinetarako.
Eraldaketa
Imanol Landa alkateak hurrengo urteetan udalerriak bizi behar duen hirigintza eraldaketa eta birsorkuntza azpimarratu ditu. Legealdi honetan burutu beharreko proiektu handietako batzuk gogorarazi ditu, hala nola, Maidagango trenbide pasagunea lurperatzea, Gobela ibaiaren egokitzapen hidraulikoa, Auzo Etxe berria eraikitzea Itzubaltzeta / Romoko Santa Eugenia aldean edo Biscaytik proiektua, Bake Eder finkan kokatuko den zentro teknologikoa eta egun Areetako merkatua dagoen lekuan eraikiko den eraikin berria. Udal agintariak esan duenez, “azkeneko hamarkadetan aurrekaririk gabeko prozesua da, udalerriari aurrerapena ekarriko diona, bai komunikazio, bai kultura azpiegituretan, baita dinamizazio ekonomikoan ere”.
Getxo Antzokia eraisten hasita, goiz honetan abiatu dituzte Algortako erdialdeko San Nikolas ingurua birmoldatzeko lanak. Ostiral honetan, hilak 19, bukatuko dute eraikina botatzen, udal iturriek aipatu dutenez, eta eremu horretan, orube zabala geldituko da. Bertan, udaberrian, lehenengo hondeatze lanak hasiko dira. Imanol Landa alkateak adierazi duenez, “eraispen honek nolabaiteko nostalgia eragiten badu ere, etapa ilusionagarri berri baten hasiera ere erakusten du: Algortako erdigunean oso maitea eta ibilia den eremuaren gaineko hirigintzako berreraketa hastea, alegia". Udal agintariaren arabera, Getxo udalerrian "azkeneko hamarkadetan aurrekaririk ez duen eraldatzeko prozesu baten hasiera da”. Getxo Antzokiaren eraikin berriaz gain, San Nikolas plaza egoiliarrentzako lurpeko aparkalekua eraikiko dute eta, lurrazalean, espazio berri eta bakarra sortuko dute, San Nikolas eta Getxo Antzokiko oraingo plazak lotuko dituena. Bestalde, antzoki berriak Algortako Udal Musika Eskolaren egoitza hartuko du, beste azpiegitura batzuen artean. Argazkian, ezkerretik eskuinera, Joseba Arregi Hirigintza zinegotzia, Imanol Landa alkatea eta Koldo Iturbe Kultura zinegotzia, Getxo Antzokia botatzen ari zirela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun