La Kantoria eta Leioako Gazte Orkestrak abestuko dute bihar Deustuko unibertsitatean
2008ko abe. 16a, 19:20
Leioako Gazte Orkestrak eta La Kantoriak kontzertua eskainiko dute bihar, asteazkena, Deustuko Unibertsitatean. Hitzordua arratsaldeko 20:00etan izango da, unibertsitateko Paraninfoan. Kontzertua, Deustuko Unibertsitatearen Euskal Ikasketen Institutuak antolatzen duen Gabonetako Kontzertua dela-eta egingo dute, Margarita Lorenzo de Reizabalen zuzendaritzapean. Kontzertuaren lehen zatian G.B. Pergolesiren "Stabat Mater" eskainiko dute, horretarako Garbiñe Abendaño sopranoaren laguntza izango dute eta baita Basilio Astulez kontratenorrarena ere. Amaitzeko Tomas Araguesen "Suite de Navidad" izeneko obra abestuko dute, euskal zein nazioarteko gabon kanta ospetsuenetarikoak osatutakoa. Horretaz gain, aipatutako egitarau hau, protagonista berdinekin, berriro entzuteko aukera izango da ostiral honetan, hilak 19, arratsaldeko 20.30ean, Leioako San Juan Bautista elizan. Era berean, Leioa Kantika Koralak Bilboko Euskalduna Jauregian eskainiko du Gabonetako kontzertua datorren abenduaren 20an, larunbata. Bilboko Udaleko Kultura eta Hezkuntza Sailak jakinarazi duenez, Basilio Astulezek zuzendutako neska-mutilek Bilboko Txistulari Udal Bandarekin batera jardungo dute jauregiko A1 aretoan, arratsaldeko 8etan. Kontzertua doakoa da, baina jesarlekuak mugatuta egongo dira. Argazkian, Leioako Kantika Korala / La idea del norte.Era berean, gaur bertan eta larunbatean, gabon kontzertuez gozatzeko aukera egongo da Kultur Leioako auditorioan. Gaurko saioa 20:00etatik aurrera izango da eta, bertan, Leioako Musika Eskolako maila ertaineko ikasleen orkestra izango da taula gainean, baita horiek osatutako musika banda ere. Larunbatean, berriz, 20:30ean izango da emanaldia, Orpheo ganbera abesbatza eta Leioako Musika Banda arituko direla. Saio bakoitzak 3 euroko sarrera izango du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun