Ekainaren 1eko uriolek gehien kaltetutako Getxo udalerriko guneetan, hau da, Neguri Langilen eta Salsidu inguruan hartuko ditu lehendabiziko presazko neurriak Uraren Euskal Agentziak. Horrela iragarri dute, gaur goizean, Esther Larrañaga Eusko Jaurlaritzako Ingurumen eta Lurralde Antolamendu sailburuak eta Imanol Landa alkateak. Aipatu eremuetan, uholde-lautadaren sakonera metro batean handiagotuko dute, Gobela errekaren ibilgua zabalago eginez. Horretaz gain, Leioako Etorbideko, Jolasetako eta Salsiduko zubiak ordezkatuko dituzte. Ekintza horiek Eusko Jaurlaritzak egindako planaren zati bat dira. Neurriak eta plana bera atzo aurkeztu zizkieten udal talde politikoei eta auzokideen ordezkariei, arratsaldean bildutako Uholdeetako Batzorde Berezian. Guzti horiek “positibotzat" jo zuten "emandako urratsa”, Landaren arabera. Hala ere, neurri horiek bakarrik, arazoa ez dutela konponduko aitortu du aitortu du alkateak, "baina bai arindu". Lanon kostua 3 milioi eurokoa izango da (lursailen okupazioaz gain) eta 2009ko udan hasiko dira, 2010ean amaitzeko. Bi ekintzok Udalbatzaren onarpena behar dute eta, horregatik, tokiko agintariak “erantzukizunez jokatzeko" eskatu die gainontzeko udal taldeei, "auzokideen eskaerei erantzuna emateko asmoz, denon arteko adostasuna lehenbailehen lortzeko”. Argazkian, azaroaren 3an, Algortako Zubilleta auzoko bizilagunek helarazitako irudia.
Eusko Jaurlaritzak diseinatutako plan osoak 18 milioi euroko kostua izango du eta Europar Batasuneko Uraren Zuzentarauaren Esparru-Akordio berriari erantzuna ematen dio, udal iturrien arabera. "500 urterako arazoa konpontzea du helburu", gaineratu dutenez. Planak honako ekintza hauek aurreikusten ditu: zubi batzuk (7 zubi eta bi pasabide) ordezkatzea, kirol-instalazio batzuetan ekintzak egitea, uholde lautadak berreskuratzea, ur-parkeak sortzea eta Gobela ibaiaren ingurumena berreskuratzea, hurrenez hurren. Ekintza guztien lanen iraupena 5 bat urtekoa izatea aurreikusten da. Ingurumen sailburuak agerraldia aprobetxatu nahi izan du udalerri guztiei deia egiteko, “euren hirigintza planeamenduak egiterakoan ibaien ibilguak ez okupatzeko”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun