EAJ ez dago inola ere ados kolektibo horrek Euskadi izenari egiten dion minusbalorazioarekin. Asmo txar hori gure herriaren sistema instituzionala eta euskal kirola desegonkortu nahi duten zenbait erakunde politikoren manipulazioarekin eta ezjakintasun historikoarekin baino ez daiteke azaldu, eta azken urteetan Euskadiko selekzioak jokatutako futbol partidek eragindako zaletuen eta, batez ere, gazteen mobilizazioaz baliatu dira horretarako.
Euskadiren izenarekin mundu osoan zehar jokatu zuten, eta baldintza okerragoetan, gerra garaian eta gerra ostean euskal selekzioko lehen jokalari haiek. Harro eraman zuten izen hura, eta guztiek zekiten zer ari ziren defendatzen kamiseta haiek soinean eramanda; halaxe ulertzen dugu egin dutela Euskadiko kamisetan eraman duten zazpi lurraldeetako jokalari guztiek.
Aitzindari haien omenez eta Eusko Legebiltzarrak gehiengoz onartu zuen Kirolaren Euskal Legeari zor zaion errespetuz (garai hartako Euskal Herritarrok alderdiko legebiltzarkideek ere onartu zuten), jokalariei eskatzen diegu berriro pentsatzeko hartu duten jarrera, bai eta bere burua abertzaletzat duen muturreko ezkerrak ipinitako tranpan ez erotzeko ere. Hala, eskatzen diegu esan dezatela beren erabakiaren atzean nor dagoen.
Izena axola zaigu, historia axola zaigu, eta, batez ere, demokrazia eta pertsonen askatasuna axola zaizkigu. Itxura guztien arabera, ordea, haietako bat bera ere ez zaie axola euskal gizartearen gehiengoaren ilusioak zapuztu dituztenei. Ea guztia koiunturala den eta dena argitara irteten den!
Euzko Alderdi Jeltzalea
EAJ: "Euskadik futbol selekzio propioa izatea nahi ez duten guztiek irabazi dute"
EAJren ustez, Euskadi eta Iranen arteko futbol partida ez jokatzea antzua, artifiziala eta kaltegarria da euskal selekzioen ofizialtasun desiratua lortzeko bidean. EAJk uste du, jokalariena dela dioten erabaki horrekin, Euskadik futbol selekzio propioa izatea nahi ez duten guztiek irabazi dutela; baita gizarte hau zatitzeko eta sumintzeko helburua dutenek ere, pertsonak manipulatuta eta kontzeptuak, terminoak eta sinboloak kutsatuta, ezker abertzaleak esan ohi duen moduan. EAJren iritziz, ez da onargarria modu susmagarrian jakinarazitako plantoa; izan ere, beren burua «euskal jokalaritzat» dutenek egindako xantaia itxura handiagoa du. Jarrera horiek ez datoz bat milaka euskal herritarren batasun eta ilusio espirituarekin, gure selekzioak jokatzen duen partida bakoitza animatzera joaten diren horien jarrerarekin, hain justu. Argazkian, 2006ko maiatzaren 21ean, Euskadi eta Galesko futbol selekzioek jokatutako partidan, EAJren gazteria den Euzko Gaztedik jarritako pankarta / jkarteaga.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun