Larunbat honetan, abenduak 20, azokatxua egingo dute Sopelan, udalerriko kolektiboen koordinadorak antolatuta, goizeko 11etatik aurrera. Batetik, liburuek eta literaturak hartuko dute udaletxeko plaza, Plaza Beltza kultur elkartearen eskutik. Izan ere, talde horrek Bigarren eskuko Liburu Azokatxua antolatu du toki horretan, irakurzaletasuna herrian eta eskualdean zabaltzeko eta herri liburutegia eta komunikazio-topagunea sortzeko. Asmo horrekin orain bi urteko Gabonetan lehenengo "azokatxua" antolatu zuten, "arrakasta handiz" gainera, ehunaka pertsona bertatik igaro eta dozenaka eta dozenaka liburu erosi baitzituzten. Hain zuzen ere, hori izan zen Plaza Beltzak egindako lehenengo ekitaldia. Urtean hiruzpalau alditan egiten dute. Etzi, truke azoka ere egingo dute, Sopelako Gazte Asanbladaren ekimenez. Hartara, etxean sobera dituzten gauza interesgarriak eramateko deia egin diete herritarrei. Azkenik, hainbat kolektiboren materiala egongo da salgai. Izan ere, Plaza Beltzak eta Sopelako Gazte Asanbladak ez ezik, Amnistiaren Aldeko Mugimenduak eta Ikasle Abertzaleek ere osatzen dute Sopelako Kolektiboen Koordinadora. Etzikoa da erakunde horren lehenengo ekitaldia. Argazkian, orain bi urteko azokatxua.
Koska irratiko "Ukberri" magazinean egin diete elkarrizketa, gaur, Sopelako Kolektiboen Koordinadorako lagunei. Irakurleak hemen dauka entzungai.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun