Maribel Prieto berangoztarra Soto del Realdik (Madril, Espainia) atera eta Avilako Brieva espetxera eraman dutela jakinarazi du Uribe Kostako Amnistiaren Aldeko Mugimenduak, Etengabe bitakoraren bitartez. Brieva Berangotik 449 kilometrotara dago. Mari Mertxe Alcocer andre algortarra ere kartzelaz aldatu dute. Dirudienez, hasiera batean Avilara eraman, baina gero Salamancako Topas espetxera eraman zuten. Bertan daukatela jakinarazi zuten atzo bere etxekoek. Topas Getxotik 412 kilometrotara dago. Bitartean, aldaketarik egon ezean, Soto del Realen jarraituko lukete Algortako Ibai Egurrola eta Amets Ladislao, eta Leioako Jabier Gutierrez. Orain bi aste atxilotu zituen bostak Irunen, Itzubaltzeta / Romon eta Berangon Guardia Zibilak. Guztiek salatu zuten "basatiki torturatuak" izan zirela. Hori dela eta, manifestazioa izango da igande honetan, abenduak 28, 13:00etan, Algortako Telletxe plazatik abiatuta. Hala ere, bi egun lehenago, hilak 26, hilabeteko azken ostirala eta urteko azkena, euskal preso eta iheslari politikoen aldeko elkarretaratzeak egongo dira Euskal Herri osoan; baita Uribe Kosta eta Erandion ere. Argazkian, abenduaren 28ko manifestazioko kartela.
Hilero bezala, 26rako, abenduko azken ostiralerako, hainbat kontzentrazio deitu du Etxerat euskal preso politikoen senideen elkarteak Euskal Herri osoan. Urteko azken ostirala dugu hilabete honetakoa. Uribe Kostan eta Erandion hainbat hitzordu izango dira: 19:30ean, Armintzan, bus geltokiaren aurrean; 20:00etan, berriz, Erandion, metro aurrean; Leioan, Boulevardean; Itzubaltzeta / Romon, Xake plazan; Algortan, Telletxen; Berangon, Gudari enparantzan; Sopelan, udaletxe aurrean eta Urdulizen, BBVAren aurrean. Bestalde, urtarrilaren 3rako, Euskal Herri mailako manifestazioa deitu du Bilbon Etxeratek, 17:30ean, Aita Donostia plazatik abiatuta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun