Imanol Landa alkateak, bestalde, "arduragabekeriatzat" jo du PP eta PSE-EEren jokabidea. Berak uste du, popularren eta sozialisten jarreraren atzean, Gobernu Taldeari bi alderdi horiek egin nahi dioten "ezkutuko boikota" dagoela; "zentsura mozioaren bitartez udal agintaritza aldatu nahi baitute", Landaren hitzetan. “Ez dute nahi udalerri honek ezta apur bat ere aurrera egin dezan, datorren martxoko hauteskundeak egin artean, Getxon gerora eragina izango lukeen PSOE eta PPren arteko paktuaren itxaropenarekin. Herriko egitasmo estrategiko garrantzitsuenen aurka egiten dute zuzenean. Ez da adostasuna bilatu ei nahi duen inoren gizalegezko jarrera”, esan du alkateak. Proeiktuak aurrera ez egiteaz duten erantzukizunagatik, "herritarrei azalpenak eman” beharko dizkietela, aipatu du Landak.
Udal agintariak iritzi dio oposizioko alderdiek "denbora nahikoa" izan dutela proiektua abiatu zutenetik -18 bat hilabete-, haren gaineko espediente eta txostenak aztertzeko. Gai horren inguruan zerbait adosteko, bi alderdiok "borondate falta" daukatela salatu du Landak, proiektuari buruz duten iritzia jendaurrean ez agertzea gaitzestearekin batera. Proiektua, azpimarratu du, "hainbat alditan aurkeztu zaie auzo elkarteei, gizarte eta kultur taldeei; baita, oro har, herritarrei ere". Gobernu Taldetik aipatu dute konplexutasun handiko proiektua dela, “inguruko bizilagunei lanak egiten diren bitartean traba askotxo eragingo dielako" "Baina txosten tekniko eta juridikoek indarrean dagoen araudia betetzen duten aldetik guztiz legezkoak direla", gaineratu dutenez.
Getxoko PPk eta PSE-EEk gaurko udal batzarrean emandako botoek Algortako Getxo Antzokia, musika eskola eta San Nikolaseko aparkaleku eta plaza berriak egiteko proiektua etenarazi dute. Popularrek eta sozialistek ezetz esan diote Getxo Antzokiaren indusketa lanen lehen fasea egitea onartzeko proposamenari, eta hortaz, fase horretako lanak emateko espedientea zabaltzeko prozesua gelditu dute. Proiektu horretarako, Espainiako Gobernuak onartutako 2.000.000 euroko diru-laguntza "galtzeko arriskua" ere badago, udal agintarien arabera. Erabaki horrek ekarriko du, Joseba Arregi Hirigintza zinegotzi jelkideak azaldu duenez, 8.000.000 euroko aurrekontua eta lanak amaitzeko 22 hilabeteko epea duen proiektu honen fase hori urtebetez atzeratzea. Getxo Antzokiaren indusketa lanen lehen fasea egiteko proiektua agintzeko egindako espedienteak “segurtasun juridiko eza” sortarazten diela adierazi dute oposizioko bi alderdi nagusiek. Argazkian, gaur egin dute urteko azken udal batzarra Getxon.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun