Bilgune Feministak egindako deialdiarekin bat eginez, 45 gizon-emakume batu zen atzo iluntzean, Algortako Telletxe plazan, Clara Rangelen hilketa salatzeko. Ustez bere bikotekideak labanaz eraso eginda hil zen herenegun Oreretan (Gipuzkoa) 35 urteko andrea. Ustezko erasotzaileak bere anaia eta emakumearen seme zaharrena ere zauritu zituen eta ondoren, bere buruaz beste egiten saiatu zen. Gertakariak baieztatzen badira, aurten Euskal Herrian bikotekideak hil duen seigarren emakumea litzateke. Horrez gain, Maria Puy Perez Lizarrako (Nafarroa) bizilaguna azarotik desagertuta dagoela gogoratu zuen Bilgune Feministak. Haren bikotekide ohia atxilotua jarraitzen du desagerpenarekin zerikusia duelakoan. Argazkian, "Patriarkatuak hiltzen gaitu! Emakumeon kontrako indarkeriari aurre egin!" irakur zitekeen pankarta atzean batu ziren Algortan.
Emakumeen Mundu Martxako plataformak adostutako protokoloari jarraituz, albistea egunkarietan atera eta 48 ordutara egin ohi dira indarkeria matxistak eragindako hilketen kontrako kontzentrazioak. Hala ere, gaur Gabon zaharra eta bihar urte berri eguna izanda, atzorako deitu zituzten Clara Rangel oreretarraren erailketa salatzeko elkarretaratzeak talde feministek. Gauzak horrela, emakumeenganako indarkeria "arazo sozial eta estrukturala" dela gogoratu zuten Algortan. Horrekin batera, instituzioek gaur egun egiten dituzten adierazpen ezberdinei "aurpegi garbitze hutsa" eta jartzen dituzten bitartekoei arazoen erroetara jotzen ez duten “partxeoa” iritzi zien Bilgune Feministak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun