EITB herri honek hedabide propioak izateko egindako apustu garbiaren ondorio dugu eta euskal herritarrak batzeko erreminta izatea eta komunitate anitz eta dibertso bat antolatzeko tresna izatea, agindu genion bere sortzeko legean; eta hori egin du 25 urte hauetan eta egingo du etorkizunean ere, euskal herritarrak elkartzeko tresna izan, Herria eta gizartea eraiki.
Euskadi eta mundua gure begietatik ikusi, ikasi eta komunikatzeko sortua, euskarazko irrati eta telebista sortzea eta hedatzea du helburu eta eginbehar. ETAk bere lehergailuarekin euskarazko irrati eta telebista isilarazi nahi izan ditu.
Gure gizartearen zerbitzura den herri hedabidea da eta horrexegatik eginbeharren artean gune kultural eta komunikatibo propioa artikulatzen laguntzea eta bere buruaren jabe izango den iritzi publikoa eratzen laguntzea agertzen zaizkigu. Horretarako, lan egin behar du EITBk bera izan dadin euskal ikus-entzunezkoaren erreferentea bai hizkuntzaren eremuan, kulturarenean, iritzi publikorenean eta, orokorrean, espazio publikoan. Horren kontra jo du ETAk, askatasunari beldur dio eta bere ekintzekin herri honi eta hau osatzen dugun gizon emakumeei gorrotoa eta herra digula erakusten digu.
ETA iragana da, amaitu nahi ez duen iraganeko amets gaiztoa, frankismoaren azken hondakina. Herri eta gizarte hau ditu etsai eta bere borroka Euskadiren eta euskal herriaren kontrakoa da. Horrexegatik, beti da garaia ETAren deuseztapena exijitzeko, argi eta garbi Euskadiren, Eusko Jaurlaritzaren eta Euskal Herriaren exijentzia berresteko, ETAk behin betirako utz gaitzala bakean. Ozen esateko: ETA utikan!
Miren Azkarate Villar, Eusko Jaurlaritzako bozeramailea eta Kultura sailburua
ETAk urtezahar egunean Euskal Irrati Telebistari eraso egin zion auto bonba baten eztandarekin. Euskal Irrati Telebista isilarazi nahi izan zuen. Eraso horrekin hedabide baten kontra jo zuen, baina eraso horretan adierazpen askatasuna eta askatasuna bera gogor erasotzeaz gainera, Eusko Jaurlaritzari eta herri-erakundeei eta bereziki Herri honi eraso egin zion. ETA Euskal Herriaren etsaia da eta ekintza berri honekin hori, berriro, agerian utzi du. ETAk jakin beharko luke Euskal Herriak ez duela amore emango eta bere erasoek ez dutela ezertarako balio, kaltea eta mina eragiteko, besterik ez. Euskal Herriaren askatasunari eta burujabetzari eraso egin dio ETAk. Euskal Irrati Telebista herri honek bere buruari emandako autogobernuaren adierazgarria eta bere burua gobernatzeko nahiaren adierazlea da. Eta ez da dohaintza izan, ez baitzigun inork eman, herri honek garatu du, guk geuk garatu dugu eta horrela gorpuztu dugu, oztopoak oztopo, Legearen letrak zioena: Euskal Herriak bere telebista, irratia eta prentsa arautu, sortu eta mantendu ahal izango ditu eta, oro har, bere helburuak lortzeko behar dituen gizarte-hedabide guztiak. Argazkian, EITBko erredakzioaren kanpoko aldea herenegun atentatuaren ostean / Disgustipado.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun