Somerako basoerdiak baino gehiago, Kantauriko uren aurrean ilargia notario zela egin genuen afaria datorkit burura. Sutsu eztabaidatu genuen, gustatzen zaizun moduan, herriaz eta herrigintzaz, martxan dabilen artean gelditzerik ez dagoen baina geldituz gero martxan jartzea geroz eta nekezagoa den kamioi zaharraz, zure osasun arazoez...
Kartzela politikak hil zaitu, 13 urteko kartzela zigor suntsitzaileak. Distantzia, hotza, elikadura eskasa, osasun zerbitzurik eza, jipoi basatiak... Eta jakin nahi dugunok badakigu.
Ez dakit, bizi dugun sufrimendu izugarriak gure hurbilenekoak mindu eta gugatik egin zein eman dezaketenaren epaile bihurtzea modan jartzen dabilen sasoiotan, nigandik espero zenuen guztia eman ote dizudan. Ni pribilegiatu sentitzen naiz zu ezagutu ahal izan zaitudalako. Agian, zu zeu izatea baino ez nuelako behar.
Fredi Payak gaur "Berria" egunkarian argitaratutako artikulua
Bizkaitarrok, menditarrok, eguzkiari itsasoan eraikitako tenplu nagusia eta guztion amaren mendia aldi berean ikus daitezkeen hildakoen atean jaso nuen zure heriotzaren berri. Non bestela. "La rubia" suertatu zen zure azken mintzaidea. Ospitalera joan aurretik deitzeko abisatu zenion, agian hurrengo goizean alta emango zizutela eta. Patuak gure berbekin jolasten du kartzela politikak zure osasunarekin beste. Alta eman zizun gauak, behin betiko. Jende gehiena elizatik kanpo geratzen da borrokalarien hiletetan. Solokoetxeko plaza beterik, bertsoak, loreak eta dantzak. Barre egingo zenuke harrizko gizonak, zure burkide maiteak, negarrez ikusita. Gauza jakina den arren harrizko bihurtzea, barruan daramaten bihotz erraldoiak hainbeste sufritzen duenari bizitzen uzteko mekanismoa dela. Baina EITBk ez du halako gauzez informatzen, nahiago du lau isunen bidez geldiaraz daitezkeen sisareen kaka arteko ibileren berri eman. Argazkia: askatu.org.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun