Aurten ere gogotsu hasi du urtea Tirante Plataformak. Ohi bezala, urtarrilean bertan, dantza garaikide ikastaroa emango dute Lutxanako eskola zaharrean, Nuria Perez bartzelonarra irakaslea dela. Horrenbestez, bi talde osatuko dituzte: bata hasi berrientzat, eta bestea maila ertainekoa. Batean zein bestean, ostiralean izango dira eskolak, 18:00etatik 19:30era, eta 20:00etatik 21:30era, hurrenez hurren. Aurretik eman beharko da izena. Ahalik eta lasterren, beraz. Izan ere, aste honetan bertan, hilaren 9an, hasiko da dantza garaikide ikastaroa. Hileko 20 euro ordaindu beharko dira eta 8 euro eskola solte bakoitzeko. Batez ere gorputzaren fisikotasuna landuko dute eta, taldeka zein bakarka, bat-bateko saioak egiteko aukera edukiko dute parte hartzaileek. Argazkian, ikastaroa iragartzeko kartela.
Orain 30 urte Katalunia aldean jaiotako Nuria Perezi dagokionez, dantza garaikide ikaslea da Bartzelonako Unibertsitate Autonomoan, EHUko Arte Eszeniko graduondokoa daukan Carles Salasekin batera. Egun, Tirante Plataformako kidea da, baita Evitame y Demas taldekoa ere. Azken horretan, ondoko ikuskizunetan parte hartu du: "1+1=1", "La teoria del ser hojalata", "Re-vestimientos" (Eusko Jaurlaritzaren diru laguntzarekin, Dantzan Bilaka'08) eta Des-constru-yendo (bideo-dantza). Besteak beste, Anne Morin, Carmelo Salazar, Bebeto Sidra, Angels Margarit, Idoia Zabaleta, Mal Pelo eta Vin Vandekeybus taldeak, Mikel Aristegi, Katie Duck... eta beste hainbat adituren eskolak jaso ditu Perezek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun