Portu Zaharrean jarritako barandak behin-betikoak ez direla dio Getxoko Udalak
2009ko urt. 8a, 18:42
Algortako Portu Zaharreko kale batzuetan erosoago ibiltzeko egiten ari diren lanak "ez dira oraindik amaitu", Getxoko Udalaren Hirigintza Arlotik aditzera eman dutenez. Ildo horretan, bizilagun eta Getxoko PPren ezinegona eragin duten baranda berrietan aldaketak egingo dituztela ziurtatu dute tokiko arduradunek. "Udal teknikariak lan horiek amaitu arte daude itxaroten erraz iristeko hartutako neurri berrien eraginaren gaineko balorazioa egiteko. Horren harira, lehenengo barandak ipini eta gero -dagoeneko jarrita daude-, jaso ahal izan dira auzo horretako bizilagunen aldeko eta aurkako iritziak, jarritako elementuek izan dezaketen eraginaren gainean", Hirigintzatik azaldu dutenez. Horren arabera, kale batzuetan jarritako elementuen zati batzuk kenduko dituzte eta beste batzuk utzi. Azken horiek ingurunearekin bat datorren koloreekin pintatuko dituzte. Argazkian, Portu Zaharrean jarritako barandetako bat.Halere, Udaletik esan dutenez, era honetako barandak "indarrean dauden eskakizun eta arauekin bat" datoz, "bestelakoan ezin daitezkeelako ipini". "Berbarako, eskudel bikoitza eta bi altuerakoa duten modeloak ipintzea derrigorrekoa da. Gainera, barandak arauetan ezarritako lodiera izan beharko du", azaldu dutenez. “Hala eta guztiz ere lanak behin amaitutakoan egin behar dira balorazioak eta ez amaitu aurretik”, nabarmendu du Joseba Arregi Hirigintza zinegotziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun