Aparkatzeko arazoak konpontzeko bozeramaileen batzordea biltzea eskatu du Erandioko PSE-EEk
Erandioko Udalak Ikerfel enpresari agindutako ikerketaren emaitzak mahai gainean jarriz, aparkatzeko toki berriak egin eta salgai jartzea eskatu zion atzo tokiko erakundeari PPk. Gaurkoan, berriz, "urgentziaz" bozeramaileen batzordeko bilera deitzea galdegin dio Mikel Arieta-Araunabeña alkate jelkideari PSE-EEk, aparkaleku eskasiari konponbidea emateko. Berriro ere "larritzat" jo du egoera Juan Otermin tokiko sozialisten bozeramaileak: "galdeketak egiten diru publikoa gastatu beharrik ez dago, nahikoa da egunero Altzaga eta Astrabuduara joatea arazoaz jabetzeko", adierazi duenez. Oterminen hitzetan, "premiazkoa da hitzarmen handiak lortu eta gure esku dagoen guztia jartzea konponbidea bilatzeko. Hala ere, argi geratu da, gehiengo absolutua izan arren, arazoari irtenbidea aurkitzeko gaitasunik ez daukala EAJk". Aipatu bozeramaileen batzordeko bilera egitekotan, aparkalekuen gabeziari aurre egiteko plan berezia hitzartzea proposatuko die udal taldeei Erandioko PSE-EEk. Argazkian, Otermin, eskuinean, aurreko udal hauteskunde kanpainan, Leioan.
Konpondu beharrean, arazoa areagotu egin dela aipatu du Oterminek. "Hainbat orube, Astrabuduako metro geltokiko zabalgunea kasu, txikiagoak dira orain, hirigintza lanak egin direlako bertan. Behin aipatu auzoko osasun etxea egiten hasten direnean, ezin izango da eremu hori erabili", Erandioko PSE-EEren bozeramaileak azaldu duenez. Aparkalekuen eskasiari aurre egiteko "erabiltzen ari ez diren hainbat tresna" badaudela adierazi du zinegotzi sozialistak: hirigintza antolamendurako plan orokor berria egitea, lur azpiko zein gaineko aparkalekuak eraikitzeko zorua eskuratzea edota industrialde izandako orubeak erabiltzea, besteak beste.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun