EHUko iturriek azaldu dutenez, tesiaren planteamendua berritzailea da, lohiak baso-lurzoruetan ongarri bezala erabiltzeko aukera aztertzeaz gain, metal astunen eta forma nitrogenatuen portaera aztertzen duelako. Azterketa horretarako esperimentuak lau urtez egin dira. Lortutako datuak aztertu ondoren, Egiartek ondorioztatu du ez dela batere komeni araztegiko lohien kantitate handia lurzoruei gehitzea, ez eta metal astunak legez onartutako mugen barruan daudenean ere. Lohietako konposatuek, oxidatzen hasten direnean, azidotu egiten dute, eta beharrezkoa da sistema alkalino bat azidotasuna murrizteko; baina lurzorua eta lohiak batzean sortzen den sistema alkalinoa ez da nahikoa azidotasun hori neutralizatzeko.
Aldiz, lohi kantitate txikiagoa -herena- aplikatzean, lurzoruaren azidotasuna eta metal astunen kopurua nabarmen murrizten da, eta sortzen den baso-biomasa kantitate handiak erabiliz sortutakoaren antzekoa da. Hala eta guztiz ere, Egiartek bere tesian azpimarratu du komeni dela aztertutakoa bezalako lur azidoetan ur-araztegietako beste lohi batzuk erabiltzea -azidoak neutralizatzeko ahalmen handiagoa dutenak eta zati organiko egonkorragoa dutenak-.
Lurzoruen azidotasuna neutralizatzeko lohi kantitate handia gehitzea ez da komeni, EHUn egindako tesi baten arabera
Araztegietako lohiek lur azidoak neutralizatzeko zein eragin duten aztertu du Euskal Herriko Unibertsitatean (EHU) egindako doktore-tesi batek. Horren arabera, lurzoruen azidotasuna neutralizatzeko lohi edo lokatz kantitate handia gehitzea ez da komeni. Araztegietako lohiak berriro erabili daitezke, adibidez, lurzoruak ongarritzeko edo lurzoruen azidotasuna murrizteko. EHUn egindako tesiaren helburu nagusia izan da araztegietako lohi anaerobikoek lurzoruaren propietate kimikoetan eta lurzoruak iragazitako uretan duten eragina -metal astunen portaera, batez ere- aztertzea. Gainera, lohi horiek baso-sailetan (Pinus radiata) duten eragina ere ikertu dute. Goio Egiarte Castañeira doktorea da tesiaren egilea, eta horren izenburua "Application of sewage sludge as amendment on acid forest soils. Effect on the soil-plant-water system, with special attention to the behaviour of heavy metals" (Hondakin-lohien erabilpena lurzoru azidoak zuzentzeko. Horrek lurzoru, landare eta ur-sisteman duen eragina, batez ere metal astunei dagokienez). Egiarte nekazaritza-ingeniaria da, eta eskolak ematen ditu Bigarren Hezkuntzan. Argazkian, Goio Egiarte doktorea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun