Alcala Mecon daukate Xabier Gutierrez preso leioaztarra
2009ko urt. 9a, 17:40
Etengabe bitakoraren irakurleetako batek, aipatu Uribe Kostako Amnistiaren Aldeko Mugimenduaren bitakoran jakinarazi bezala, pare bat aste baino gehiago dira, Xabier Gutierrez "Guti" leioaztarra, Soto del Real espetxetik Alcala Mecora aldatu zutela. Biak ala biak Madrilen daude, aipatu azkena Leioatik 418 kilometrotara. Ibai Egurrola eta Mari Mertxe Alcocer algortarrak eta Maribel Prieto berangoztarra ere atera zituzten Soto del Realdik, urtea amaitu baino lehen, Navalcarnero, Salamancako Topas eta Avilako Brieva kartzeletara eramateko, hurrenez hurren. Bitartean, azken orduko aldaketarik egon ezean, Soto del Realen jarraitzen du Algortako Amets Ladislao. Orain hilabete inguru atxilotu zituen bostak Irunen, Itzubaltzeta / Romon eta Berangon Guardia Zibilak. Guztiek salatu zuten "basatiki torturatuak" izan zirela. Argazkian, torturak salatzeko, abenduaren 28an Algortan egindako manifestazioa.Hala ere, ez dira horiek bakarrik izan azken aldian espetxez aldatu dituzten Uribe Kostako herritarrak. Joan zen astean atera zuten Segoviako (Espainia) espetxetik Zigor Goikoetxea gazte getxoztarra eta, azkenean, bere etxekoek jakin izan dute Topasen (Salamanca, Espainia) dagoela orain. Urtarrilaren 21ean epaiketa egingo diote Espainiako Auzitegi Nazionalean Goikoetxeari, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Hartara, egun horretarako Madrilera eraman beharko dute. 2008ko abuztuan atxilotu zuten Azkorriko mutila, San Lorentzo eguneko Algortako azokan, Marisa Arrue Getxoko PPren bozeramaileak bere kontra irainak bota zituela jarritako salaketaren ondorioz. Salamancako Topas espetxea Getxotik 412 kilometrotara dago. Bitartean, Navalcarnerora eramandako Ibai Egurrola, ziega berean, algortarra ere den Joseba Elorriagarekin jarri dutela jakinarazi dute horren lagunek. Algortan, Getxon eta Berangon 2007ko urriaren 17an izan zen polizia operazioan atxilotu zuten Elorriaga gaztea eta ordutik dago preso.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun