Araztegiaren aurkako ekintzei "babes argia" erakustea eskatu diete Lamiakoko auzotarrei
Larunbatean egindako ekitaldien protagonista nagusia "berriro ere jende eskasia" izan zela kritikatu du, bere bitakoran, Lamiakoko Araztegiaren kontrako Herri Ekimenak. "Auzotar gehienak araztegiaren aurka daude, baina hori ez da nahikoa. Herritarrek babes argia erakutsi behar diete aldarrikapenei, borroka honek bere helburua lortzeko", plataformako kideek adierazi dutenez. Hurbildu ziren guztiei eta, bereziki, Udondo gaztetxeko neska-mutilei esker ona agertu die herri ekimenak. Hainbat ordutako lanaren ostean, eguneko giro hotza epeldu zuten gazteek, Delta lantegia zenaren hormetako batean egindako graffitiaren bitartez. Bihar bertan ohiko bilera egingo du taldeak, 20:00etatik aurrera, Gabriel Aresti kaleko 3. zenbakian dagoen Lamiakoko kultur zentroan, San Maximo elizaren atzealdean. Argazkian, gazteek egindako graffitia.
Aipatu batzarrean, larunbateko ekitaldien balorazioa egiteaz gain, Bizkaiko Batzar Nagusietara eta arartekoari bidaltzeko idatzia adosten ahaleginduko dira. Bitartean, graffitia marraztea ez zen jarduera bakarra izan herenegun Lamiakon. Goizeko 11etatik aurrera, txokolate jana, haurrentzako jolasak, kartel eta informazio banaketa eta musika egon ziren, besteak beste, "Araztegirik ez!" aldarrikapena zabaldu nahian. 150 euroko balioa daukan marisko otzara baten zozketan parte hartzeko txartelak oraindik daude salgai, euro batean, Leioako hainbat establezimendutan. Batutako dirua herri ekimenaren baliabideak (kartelak, eskuorriak, larunbateko margoa...) finantzatzeko erabiliko dute. Hilaren 30ean jakingo da zein den otzararen irabazlea, ONCE itsuen elkarteko zozketan suertatutako zenbakiari begiratuta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun