Leioako Udalak eta Eusko Jaurlaritzaren Etxebizitza Sailak sinatutako hitzarmenaren arabera, babes ofizialeko 405 etxebizitza eraikiko dituzte Leioandi eremuan; horietako 101 alokatzekoak. Horretaz gain, salmenta libreko 218 pisu altxatzen utziko diete sustatzaile pribatuei. Hirigintza eta eraikuntza lanak aldi berean hasiko dira, "epeak murrizteko", adierazi dutenez. Urtearen bukaeran ekingo diete obrei eta 36 hilabetez luzatuko dira. Horretaz gain, udaletxetik Sarriena auzoan dagoen Irlandesas ikastetxeraino, gutxi gora behera, etorbide berria egingo dute. Aipatu lanok Leioako metro geltokitik EHUra arteko tranbiaren trazaduraren lehenengo faseari dagozkie. 650 metro luzerako tartea hartuko du garraiorako kanalak eta, Irlandesasetik campuserako zatia bigarren faserako utziko dute. Hain zuzen ere, etxebizitza babestuak hartuko dituzten lursailen aurrealdetik igaroko da tranbia eta bidegorria ere jarriko dute. Etxebizitza Sailak 58,3 milioi euro baino gehiago inbertituko ditu operazioan. Argazkian, atzo eguerdian sinatu zuten hitzarmena Eneko Arruebarrena Leioako alkateak eta Javier Madrazo Etxebizitza sailburuak.
Azalera-eskubidepean saltzekoak diren BOEak 2010eko bigarren seihilekoan zozketatuko lirateke, epeka agian. Alokairuko etxebizitza sozialak benetan amaitzear daudenean zozketatuko lirateke. Leoian erroldatuta eta Etxebiden izena emanda daudenei esleituko zaizkie etxeak. Udalak lurzoruaren jabe pribatuekin hitzartuko du lursailak lagatzea eta Eusko Jaurlaritzari utziko dizkio. Etxebizitza Sailak bere gain hartuko ditu lursailak eta Udalaren urbanizatze karga guztiak eta babespeko etxebizitzak eraiki eta urbanizazio lanak burutuko ditu. Era berean, konpromisoa hartu dute etxebizitza bloke bakoitzaren konposizio bolumetrikoa eta fatxada ezberdinak izango direla eta goi mailako arkitekto talde ezberdinek egingo dituztela proiektuak. Lau bloke izango dira guztira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun