Getxoko PPk proposatutako tasen eta zergen jaitsiera "Udala ekonomikoki desorekatzea" ekarriko lukeela adierazi du EAJ buru duen Gobernu Taldeak. Udal batzarrean aurkezten dituzten mozioen bidez, "udal gastua oraindik gehiago areagotzea" eskatzen duten bitartean, diru sarrera arruntak "izugarri" murriztu nahi izatea leporatu diete popularrei tokiko agintariek. "Kontraesanaz" gain, "arduragabekeria" deritzote proposamenari. Imanol Landa alkatearen hitzetan, “eskaera elektoralista hutsa baino ez da eta, batez ere, guztiz zuhurtzia gabea, krisialdian gaudela kontuan hartuta". Udal agintariaren arabera, "datozen hauteskundeetan boto batzuk lortzeko den-dena erabiltzen dute". Argazkian, Imanol Landa alkateak eta Aitor Soloeta Ogasun eta Ekonomia Sustapen zinegotzia, artxiboko irudi batean.
Landak aipatu duenez, "tasen eta zergen kasuan herritarrenganako presio fiskalaren jaitsiera 6 puntukoa izan da eta horrek, Bizkaiko 112 udalerrik osatutako taularen erdian kokatzen du Getxo". Alkateak kritikatu duenez, iazko udazkenean, “PPk ezer negoziatu nahi ez izateaz gain, horretarako egindako udal batzarrean, PSE-EErekin batera, enplegua sortzeko, jarduera ekonomikoa berpizteko eta alokatzeko etxebizitzak sustatzeko hobari fiskalak ezartzeko proposamen guztiak atzera bota zituen". "Horrek beste behin ere agerian uzten du akordioak bilatzeko borondate eza eta bere proposamenaren kutsu elektoralista”, udal agintariaren ustez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun