Jose Luis Rodriguez Zapateroren exekutiboak onartutako tokiko erakundeei laguntzeko funtsetik, 14.468.083 euro egokitu zaizkio Getxo udalerriari. Gauzak horrela, dagoeneko hainbat egitasmorako 11,5 milioi euroko diru laguntza eskatzea erabaki du Getxoko Udalak; oposizioko taldeek egindako proposamen batzuk horien artean direla. Gainontzeko hiru milioi euroak eskatzeko, baina, ez ei du horren eskuzabal jokatu Getxoko Gobernu Taldeak. Asteartean emandako prentsaurrekoan, oposizioko taldeak "berriro ere mespretxatzea eta alde batera uztea" egotzi zien udal agintariei Iñaki Urkiza Getxoko EBren bozeramaileak. "Eskaera aurkezteko epea murritza -urtarrilaren 24a da azken eguna- dela argudiatuta, gure proposamenak aztertzeko denborarik ez dagoela esan eta horiek ez onartzea erabaki zuten", astelehenean bildutako Bozeramaileen Batzordean, Urkizak azaldu zuenez. Gauza bera aipatu zuen, Marisa Arruerekin batera, asteartean ere prentsaurrekoa eskaini zuen Eduardo Andrade Getxoko PPren zinegotziak. Aipatu batzarrean, EAJren Udal Gobernuak berak egindako zerrendatik, "zein proiekturi lehentasuna eman" nahi dioten erabaki behar dutela esan zieten, Andraderen hitzetan.
Akats larriak
Diru laguntza eskatzeko proiektuetatik "batzuk interesgarriak, beste batzuk interes gabekoak eta gainontzekoak akats larriak" direla adierazi zuen Urkizak. Esaterako, Aiboako metro geltoki inguruan igogailuak jartzeko egitasmoan, "goiko aldea ahaztuta utzi" dutela kritikatu zuen Getxoko Ezker Batuko bozeramaileak; udaletxera, ogasunera, udal egoitzara edota osasun etxera heltzekoak, alegia. Gizarte Zerbitzuak Urgullera aldatzeko erabakiari dagokionez, "Foru kalean soberan daudela uste dute eta bertatik kendu nahi dituzte, horretarako Emakumeen Etxea eta Algortako Nagusien Etxea handitzeko lanak zapuzten badituzte ere. Beste sailen bat jarri nahi izango dute Foru kalean", kritikatu zuen alderdi federalistaren zinegotziak. Azkenik, Urgull kaleko eraikinaren bigarren pisuan Emakumeen Etxea jartzea "Landa alkatearekin berarekin hitzartuta" zeukala aipatu zuen Urkizak. "Politika sektorialetarako lokalik ez dutela nahi diote orain. Hala ere, gaztelekua egingo dute bertan", gaineratu zuenez.
Algortan Emakumeen Etxea jartzeko egitasmoa "zapuztea" egotzi dio Udalari Getxoko Ezker Batuak
Ez da ohikoa Iñaki Urkiza Getxoko Ezker Batuko bozeramailea prentsaurreko bat ematen ikustea. Kontua da Gizarte Zerbitzuak udaletxe ondotik Algortako Urgull kalera aldatzeko asmoa agertu berri duela Getxoko Udalak; antzinako kultur etxeko eraikinera, hain zuzen ere. Eta horrek zinegotzi federalistaren "haserrealdia" eragin du. Hori egiteko, Espainiako Gobernuari eskatuko dio diru laguntza tokiko erakundeak. Astearteko agerraldian, Algortako Nagusien Etxea handitu eta Emakumeen Etxea jartzeko proiektuak "zapuztea" egotzi zien udal agintariei Urkizak. Urgulleko eraikinaren lehenengo eta bigarren pisuan joan beharko lirateke horiek. Getxoko EBko zinegotziak azaldu zuenez, "dagoeneko dirua bideratuta zegoen horretarako", 2006ko eta 2007ko aurrekontuetatik, ia 3.250.000 euro guztira. Bere garaian bi proiektuok "hedabideetan iragarri" zirela ere aipatu zuen; baita hori guztia frogatzeko agiriak erakutsi ere. Sos horiek Zabala kaleko zaintzapeko apartamentuak egiteko erabiliko omen dituzte. Horrekin batera, tratu txarrak jasandako emakumeei ostatu emateko zerbitzua jartzeko, Espainiako Gobernuari dirua eskatu ez izanak "hutsegite galantatzat" jo zuen Urkizak. Argazkian, Iñaki Urkiza astearteko prentsaurrekoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun