Hernaniko Santa Barbara auzoan leherketa izan da bart goizeko ordubata aldera. Ertzaintzak jakinarazi duenez, telebista hedagailuko kasetaren aurka jarri dute bonba bat. Leherketaren ondorioz ez da inor zauritu eta zer nolako kalte materialak izan diren aztertzen ari dira dagoeneko. Bitartean Hernaniko ehunaka auzokide telebistarik gabe gelditu dira, berria.info-k zabaldu duenez. Polizia autonomikoaren arabera, hedagailuaren ondoan hainbat kartel zeuden jarrita "Kontuz, bonba. ETA" mezuarekin. Hedagailuaren inguruetan bi motxila topatu eta desaktibatu ditu Ertzaintzak, horiek ere lehergailuekin. Herrizaingo sailak jakinarazi duenez, lehenengoak hamar kilo lehergai eta bi kilo metraila zituen. Bigarrenak, berriz, lau kilo lehergailu zituen. Bien ala bien lehergailua amonitol izango da seguru aski eta biak kable batzuetara konektatuta zeuden. Polizia autonomikoak bi motxilak bonba-tranpatzat jo ditu eta ertzainak kablearekin estropozu egin eta eztanda harrapatu nahi izatea leporatu dio ETAri. Argazkian, Lehergailuak Indargabetzeko Unitateko ertzainak, pasa den maiatzean Areetan, Abrako Itsas Erret Klubeko hondakinak miatzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun