Patxi Lopez lehendakari izango den erabaki arte, Getxoko PSE-EEk ez du Landaren aurkako zentsura mozioa babestuko

Getxoko PSE-EEk momentuz ez du Marisa Arrue PPren tokiko bozeramaileak proposatutako zentzura mozioa babestuko. "Deia" egunkariak jasotako adierazpenen arabera, Imanol Landa alkate jelkideak "ondo merezita" lukeela uste du Luis Almansa eledun sozialistak. Hala ere, "une honetan, Eusko Legebiltzarreko hauteskundeak irabazi eta Patxi Lopez lehendakari jartzea da gure lehentasuna. Gero, gerokoak", Almansak adierazi duenez. Bitartean, Getxoko Ezker Batuak ezetza eman dio zentsura mozioa babesteari, "hauteskundeen aurretiko garaietan egonda". Landa alkateari "konfiantzazko botoa" ematearen alde agertu da Iñaki Urkiza EBren tokiko zinegotzia, "gauzak zuzendu ditzan". Zentsura mozioa aurkezteko beste hiru zinegotziren sinadurak behar ditu Getxoko PPk, hamar ordezkari popularrek sinatu dutela kontuan hartuta. Argazkian, Luis Almansa Getxoko PSE-EEren bozeramailea.