Getxoko PSE-EEren jarrera definitzeko, "traizioa", "iruzurra" eta "faltsukeria" hitzak erabili zituen atzo Marisa Arrue PPren tokiko bozeramaileak. "El Correo Español" egunkariak jasotako adierazpenen arabera, dagoeneko baztertu du Luis Almansa Getxoko PSE-EEren eledunak, Imanol Landa alkate jelkidearen aurkako zentsura mozioa babestea. "Aurreikusten dugun zentsura ariketa martxoaren 1ekoa da: guztion eta guztiontzako Euskadi baten aldeko eta euskal gizartean zatiketa eta liskarrak dakartzaten Ibarretxeren politika baztertzaile eta soberanisten aurkako herritarren botoak, alegia", adierazi zuenez. Getxo udalerrirako, berriz, "elkarrizketa eta adostasuna" gura ditu Almansak; "herritarrak eskatu bezala". Zentsura mozioak "zatiketa" ekarriko luke, bere hitzetan. Igandean ere kritika gogorrak jaso zituzten Getxoko PSE-EEkoek. Santurtzin egindako ekitaldian, oraindik EAJ alkatetzan jarraitzearen "errua" sozialistei bota zieten Mariano Rajoi eta Antonio Basagoiti buruzagi popularrek. Argazkian, PSE-EE eta PPk batera jardun eta prentsaurrekoak batera ematen zituzteneko irudi bat.
Atzokoan, berriz, Marisa Arrue Getxoko PPren bozeramaileari tokatu zitzaion haizeak harrotzea. "Aho betean Imanol Landa alkate jelkidearen udal politika kritikatu bai, baina ez dira kapazak bestelako gobernua osatzearen alde egiten", adierazi zuen popularren tokiko buruak. Arrueren hitzetan, "Getxon aldaketaren beharra aldarrikatu zuen udal hauteskunde kanpainan PSE-EEk. Hala ere, ez du egungo egoera aldatzeko asmorik. Hain zuzen ere, horregatik dabil bozkatu ziotenei traizioa egiten". Baina, PPren ordezkariaren ustez, Getxoko ez da "salbuespena": "Sozialisten eskutan badago, Juan Jose Ibarretxek jarraituko du lehendakari eta Imanol Landak Getxoko alkate", kritikatu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun