Alangoko polizi-etxe zaharberritura bueltatuko dira bihar Getxoko udaltzainak

Asteazken honetatik (urtarrilak 21) aurrera, Algortako Alango kaleko 25. zenbakian dagoen polizi-etxean egingo die arreta, berriro, herritarrei, Getxoko Udaltzaingoak. Zaharberritze lanak behin amaituta, eta azken hilabeteak behin-behinean Aiboako antzinako institutuan eman eta gero, polizi eta aurrezaintza zerbitzu guztiak behin betiko Udaltzaingoaren egoitza ofizialera eraman dituzte. Bestalde, Alangon bertan, zirkulazio noranzko bakarra ezarriko dute, ostegunetik (hilak 22) aurrera, Foru eta Martikoena kaleen arteko zatian. Forutik Martikoenarantz ibili beharko dira autoak. Bide tarte horretan, ilarako aparkalekuak jarriko dituzte kalearen albo batean. Hain zuzen ere, orain gutxi zabaldutako osasun etxera joateko, aipatu kalean utzi ohi dute kotxea hainbatek "zirkulazioan trabak eraginez", udal iturrien arabera. Horregatik egin dute aldaketa. Argazkian, Getxoko udaltzain bat.