Getxo udalerrian erosketak egiteko autobusa jarriko diete bihar itsas-bidaiariei
2009ko urt. 20a, 17:40
Balmoral itsasontzi handiak zabalduko du asteazken honetan, hilak 21, Bilboko Portuko bidaiari-ontzien denboraldi berria, eta Algortako kaian igaroko du gaua. Eskoziaren omenez izena hartzen duen ontzi horretan, 1.400 bidaiari eta 500 eskifaia-kide doaz. Guztiei, informazioa eskainiko die Getxoko Turismo Bulegoak, udalerrian ibili edo erosketak egiteko, udal iturriek aipatu dutenez. Horretarako, Areeta eta Algorta lotuko dituen autobusa jarriko die Udalak. Tokiko arduradunek azaldu dutenez, "garraio zerbitzu berezi hori ontziaren ordutegietara moldatuko da. Izan ere, hala nahi izanez gero, nahi dutenek herriko lekurik garrantzitsuenak bisitatu ahal izango dituzte, hala nola, Bizkaiko Zubia, Portu Zaharra, Kirol Portua bera, zein Areeta eta Algortako erdiguneak ere, erosketak egin edo aisialdiaz gozatzeko". Balmoral bidaiari-ontzia Fred Olsen enpresarena da eta 188 metroko luzera dauka. 1988an eraiki zuten Alemanian eta 738 kabina ditu. Iaz etorri zen lehen aldiz gure kostaldera eta aurten berriro itzuliko da, ekaina aldera. Argazkian, 2008ko urriaren bukaeran Algortako kaia bisitatu zuen Queen Elisabeth 2 itsasontziak, bere azken bidaian.Udalerriaren turismo eta merkataritzaren ganeko informatze eta sustatze lana egingo da, eskaria jaso dezaketen arlo guztietan, hala nola: interes handia duten leku historiko, artistiko eta parajeetara zelan heldu, garraio, jatetxe, taberna, delicatessen-dendak... non aurkitu; baita denden (non dauden eta ordutegiak); eta herritarrentzako eta gizarte zerbitzuen (farmaziak,....) berri emango zaie ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun