Espainiako Auzitegi Nazionaletik irtetean, gaurkoa "konponduko den akats bat baino ez" dela adierazi du Marisa Arrue Getxoko PPren bozeramaileak. Gaineratu duenez, berriro bueltatuko dira Madrilera akusatua -Zigor Goikoetxea- epaitzera, bere hitzetan, "Euskadin normaltasuna nagusi izateko eta bertan askatasunez bizi ahal izateko borrokan" jarraituko dutelako "EAEko zein Espainia osoko popularrek". Egun "askatasunik ez" dagoela aipatu du Arruek. Ildo horretan, "kartzelan amaitzea" opa dio Goikoetxeari Getxoko PPren buruak; baita "bera bezala, mehatxuka eta jendeari erasoka doazen guztiei" ere. Gaineratu duenez, "erakunde horietako batean sartzea buruan duten morroientzat eredua izan dadila guzti hau; birritan pentsatu eta ikus dezatela bide horretatik ez dutela ezertxo ere lortuko".
Aurrekari bat markatu du
Alfontso Zenon abokatuak, ordea, "larritzat" jo du Zigor Goikoetxearen kontrako epaiketa, "dagoeneko aurrekari bat markatu duelako", bere ustez. "Gara" egunkariak egindako elkarrizketan azaldu duenez, haren kontra, sei eta hamar urte bitarteko espetxe zigorra eskatzen dute. PPko zinegotzi bati mehatxu egitea leporatzen diote, nahiz eta bere kontra inolako frogarik ez duten, bakarrik zinegotzi horren hitza. "Kontu nahiko larria da, dagoeneko aurrekari bat markatu duelako. Orain PPko edozeinek Euskal Herriko gazte bat salatzen badu, automatikoki kartzelara joateko arriskua dauka. Bere hitzarekin bakarrik. Eta ez dute beste frogarik behar. Zuk ezetz, baina kartzelara. Horrek, ustezko demokrazia batean, ez luke inolaz ere horrela izan behar", azaldu duenez.
Amnistiaren Aldeko Mugimenduak ere oraingoan "beste urrats bat" eman nahi dutela uste du: “herritarrak isilarazi eta zigortzeko, egindako protestak eta esandako lemak kriminalizatu nahi dituzte, mehatxu eta irain modura interpretatuz, eta horien egileak kartzelara eraman”, AAMk salatu duenez.
Uribe Kostako AAMren adierazpena:
Eraso berria
Zigorren aurkako kasu hau alderdi politikoek, komunikabideek eta aparatu judizialek eskuz esku aurrera daramaten eraso berri bat da. Euskal Herria salbuespen egoeran aurkitzen da eta erasoak gero eta zabalagoak dira. Orain beste urrats eman dute, herritarrak isilarazi eta zigortzeko, egindako protestak eta esandako lemak mehatxu eta irain modura interpretatuz.
Errepresioaren jomugak ezartzen dituzten komunikabideak, gerra tribunalak, polizia torturatzaileak… denak balio du independentziaren aldeko borrokarekin amaitzeko gurutzadan. Azoka batean politiko batzuen aurrean protesta egitea honelako jazarpenekin ordaintzen den egoera bortitza ezarri dute gure herrian, errepresioarekin itsuturik dauden gobernuek.
Deialdia egiten dugu eraso honi aurre egiteko, behin hortik abiatuta holako gertaerak zigor ez ditzaten!
Aski da!
Muntaia zapaltzailerik ez!
Zigor askatu!
Forma akatsa dela eta atzeratu egin dute Zigor Goikoetxearen aurkako epaiketa
EFE albiste agentziak zabaldu duenez, Zigor Goikoetxea preso getxoztarraren kontrako epaiketa atzeratzea erabaki du gaur Alfonso Guevara Espainiako Auzitegi Nazionaleko epaileak, forma akatsa dela eta. Auzi horren instrukzioa prozedura laburtuaren bidez tramitatu denez, akusazio partikularrak galdegin duen zigorra ezin dela eskatu ondorioztatu du magistratuak. Alfontso Zenon Goikoetxearen abokatuak egin du epaiketa atzeratzeko eskakizuna. Izan ere, Marisa Arrue Getxoko PPren bozeramailearen letradunak hamar urteko espetxe zigorra eskatzen du Azkorriko gaztearentzat, "mehatxu terrorista" delitua leporatuta. Hori sumarioa denean baino ezin daiteke galdegin, eta ez prozedura laburtuaren bidez, iturri berberek adierazi dutenez. Gauzak horrela, Ismael Moreno instrukzioko epaileari igorriko dio berriro kausa Guevarak. Morenok akusazio eta defentsari bueltatuko die, gertaerak berriro kalifika ditzaten bi aldeek. EFEren arabera, orduan aldatu beharko du zigor eskaera akusazio partikularrak edo, bestela, auzia sumario bihurtu. Bitartean, fiskalak eta PPk, azken hori akusazio popular gisa, sei urteko espetxe zigorra eskatzen dute Goikoetxearentzat. Arruek berak aurkeztu zuen gazte getxoztarraren aurkako salaketa, San Lorentzo eguneko Algortako azokan, bere kontra irainak bota zituelakoan. Argazkian, Zigor Goikoetxearen askatasuna aldarrikatzeko, abuztuaren 26an egindako manifestazioa / Etengabe.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun