Espainiako Gobernuak ordainduko ditu Sopelako haur eskola eta Urko kiroldegiko lanak
2009ko urt. 21a, 16:43
Espainiako Gobernuari eskatutako dirua, haur eskolako lanetan eta Urko kirol gunean inbertituko du Sopelako Udalak. Erabakia atzo, urtarrilak 20, egindako osoko bilkuran hartu zuten, Berdeek izan ezik -abstenitu ziren-, udal talde politiko guztiek aldeko botoa eman ostean. Jose Luis Rodriguez Zapateroren exekutiboak onartutako tokiko erakundeei laguntzeko funtsetik, 2.145.000 euro egokitu zaizkio Sopelari. Diru laguntza hiru egitasmo burutzeko erabiliko da. Haur eskolaren lanek hartuko dute inbertsioaren zati bat. Hori Zaldu sektorean egongo da eta 0 eta 2 urte bitarteko 32 haurrentzat izango du tokia. Urko kirol guneko harrera zentroak hartuko du diru laguntzaren beste zati bat. Azkenik, kirol gune bereko futboleko aldagelak berritzeko eta handitzeko erabiliko da azken zatia. Argazkian, azaroan egindako ez ohiko osoko bilkura Sopelan.Imanol Garai alkateak, hiru egitasmoen garrantzia azpimarratu du. “Erabakia hartu aurretik herriak dituen beharrak zeintzuk diren hausnartu genituen. Sopela gazte jendez betetako herria da eta, hain zuzen, hiru proiektuak haiei zuzenduak dira”, aipatu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun