Espainiako Gobernuak emandako dirua erabiliko dute Leioan kiroldegi berria egiteko
2009ko urt. 21a, 17:23
Leioako Udalak Pinosoloko kiroldegia egiteko erabiliko du, Espainiako Gobernuari eskatutako diru laguntzaren zatirik handiena. Jose Luis Rodriguez Zapateroren exekutiboak onartutako tokiko erakundeei laguntzeko funtsetik, 5 milioi euro inguru egokitu zaizkio udalerriari. Gauzak horrela, diru horren erdia baino gehiago, 2,7 milioi euro, aisialdi eta kirol gune berrira bideratuko dute tokiko agintariek. Eraikin berriak, besteak beste, estalperik gabeko hiru igerileku, solariuma, tenis eta padel pistak, korrikarako zirkuitua eta kafetegia izango ditu. Bitartean, Sarrienako futbol zelaietako harmailetan hobekuntzak egiteko, milioi bat euro zuzenduko dute. Gainera, ikasketa gelak ere jarriko dituzte bertan, entrenatzen dabiltzan kirolarientzat. Horretaz gain, Pinuetako Cervantes plaza birmoldatuko dute, estalpeko gune bat jarriz. Txorierrin, berriz, estolderia berriztatu dute, eta beste hainbat kale eta ezpaloi konponduko dituzte. EAJk eta Ezker Batuak osatzen duten udal gobernuaren proposamena begi onez ikusi dute PSE-EEk eta PPk. Argazkian, Leioako udaletxea.Alfonso Lopez Leioako PSE-EEren bozeramaileak "Gobernu sozialistak emandako funtsen garrantzia" azpimarratu du, "enplegua sortzen lagunduko baitute". Alderdi Popularrak bezala, proiektu garrantzitsuagoak egon daitezkeela uste dute, hala nola, Txorierri eta Lamiako arteko igogailua jartzea. "Hala ere, egitasmo horren elaborazioa konplexuagoa dela eta denborarik ez dagoela azaldu digute. Gauza bera gertatu da Lamiakon, non zalantzagarri suerta zitekeen hainbat gune birmoldatzea, utzitako hainbat enpresa botatzea ez genekielako zer eragin izango zuen", azaldu du Lopezek. Xabier Olabarrieta Leioako PPren bozeramaileak ere "positibotzat" jo zuen lehen aipatu proiektuak egitea. "Garrantzitsuak ere diren beste batzuk aurkeztea bazegoen, baina gai konplexuak dira eta ez dago denbora nahikorik", gaineratu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun