Bosgarren urtez antolatu du "Maite maitea" maitasun gutunen lehiaketa Sopelako Udal Kultura Sailak. Horrenbestez, interesatutako lagunek euskaraz edo gaztelaniaz idatzitako nahi beste gutun aurkezteko aukera izango dute otsailaren 10era bitartean. Gaia librea izango da, beti ere maitasuna edo maitasun ezarekin erlazionaturik baldin badago. Lehiaketa bi kategoriatan banatuta egongo da: batetik, gazteak, 12 urtetik 15 urtetara eta 16 urtetik 18 urtetara arteko azpitaldeak bereiziz; eta bestetik, nagusiena, beste bi multzok osatuta: 18 urtetik gorakoak eta 60 urtetik aurrerakoak, hain zuzen. Sariak, gazteen kategorian, adinaren araberako ezusteko oparia eta, nagusien artean, bi pertsonentzako afaria izango dira. Idatziak lehen aipatu eguna baino lehen eman beharko dira udaletxean (astelehenetik ostiralera, 18:00etatik 21:00etara) edo Turismo Bulegoan (astelehenetik larunbatera, 11:00etatik 14:00etara eta 16:00etatik 19:00ak arte, eta igandeetan goizez bakarrik).
Maitasun gutun lehiaketako oinarrietan zehazten denez, ezinbesteko baldintzak dira hauek: bi orrialdeko gehienezko luzera eta jatorrizko lanak izatea. Gutun bakoitzak izengoiti edo lelo ezberdin bat eraman beharko du. Gutun-azalean kategoria agertuko da. Honen barruan beste gutun-azal bat sartu beharko da, azalean izengoitia zehaztuz eta barruan egilearen datuak aipatuz (izen-abizenak, adina, helbidea eta telefono zenbakia). Epaimahaiaren erabakia otsailaren 14an, San Valentin egunean, emango dute ezagutzera. Sari banaketa ere egun horretan izango da, udaletxean 19:00etan egingo duten ekitaldian. Saria jasotzeko ezinbestekoa da ekitaldi horretara joatea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun