Orain, Askatasuna, 1998an sortutako alderdi politikoa, hauteskundeetara aurkezteko izapideak hasi dituela hedabideengatik jakin ahal izan dugu. Alderdi hori Batasunak ordezkatzen duen Ezker Abertzaleak martxoaren 1ean parte hartu ahal izateko egin duen saiakera dela jakintzat jotzen dute.
Nik, hedabideek dioten haratago, ez daukat hori horrela denetz baieztatzeko datu nahikorik. Horrelakorik egiaztatuko balitz, berriro ere EAE eta EHAK hauteskundeetara eraman zituen estrategia bera errepikatuko litzateke. Alegia, lehenengo zerrenda bat aurkeztea, jakinda ilegalizatua izango dela eta, aldi berean, beste alderdi bat sustatzea, ezin izango dena ilegalizatu edo bere jarduerak ezin izango dituztenak eten.
Baldintza hauetan, sinatzera joateko deialdia ez egitean asmatu genuelakoan nago. Izan ere, hiritarrak ahalegina egiteko dinamikan murgilduta daude berriro, plataformaren suspertzaileek ahalegin hori Alderdien Legea salatzeko balio sinbolikoa besterik ez duela dakitenean. Gainera, plataforma bat ilegalizatu dutelako hauteskundeak antidemokratikoak direla esateko erabiliko dira sinadura horiek.
Ezker Abertzalea ordezkatzen duen Batasunak dinamika hori nora bideratzen duen hausnartu beharko luke. Askatasunak ordezkariak lortu eta legebiltzar taldea eratuko badu eta ondoren ilegalizatua bada, Batasuna eta EHAK-rekin ezagunagoak zaizkigun egoerak biziko ditugu berriro.
Beharrezkoa da sektore politiko horrek azterketa errealista egitea, estrategia hori eusteko baino ez baita baliagarria, eta ez Arnaldo Otegik berak proposatzen duen bezala, irabazteko. Irtenbidea politikaren aldeko ezbairik gabeko apustutik igarotzen da. Esaldi horrekin ez nator proposatzera Batasunak indarkeria gaitzetsi dezan, baizik eta ETAk bidea zabalik utz dezan, indarkeriari amaiera emanez. Berriro diot ETA presente egon arren ere Batasunak hauteskundeetara aurkezteko eskubidea duela. Proposatzen dudana zera da, norabide aldaketa baten beharra. Izan ere, egungo norabideak gertaera berdinen etengabeko errepikapenera eta bakea eta normalizazioranzko aurrera egitea bermatuko duten etorkizuneko konponbideak bilatzeko gaitasun ezara garamatza.
Paul Rios Lokarriren koordinatzaile nagusiak atzo paulrios.nireblog.com bere bitakoran argitaratutako artikulua. Erredakzioan itzulita.
Paul Rios: "D3M eta Askatasuna"
2009ko urt. 21a, 20:31
Pasa den astean, D3Mk hauteskundeetara aurkezteko eskubidea duela defendatzeko komunikatua kaleratu zuen Lokarrik. Plataforma hori hautes-zerrendak osatzeko izapideak bete ahal ditzan gure kolaboratzaile eta bazkideei sinadura ematera joan daitezen eskatuko genienetz izan zen gure zalantza bakarra. Gakoa argitzeko barne kontsulta abiatzea deliberatu genuen eta parte hartu zuten pertsonen gehiengoak ez genuela egin behar deliberatu zuen. Lokarrirekin kolaboratzen duten 40 lagun baino gehiagok eman zuten bere iritzia eta kopuru hori ez da batere makala, Lokarriren erabaki baten edukia era horretaz ebazten genuen lehenengo aldia zela kontuan hartuta. Askatasun demokratikoen ikuspegitik, D3Mk aurkezteko eskubide osoa dauka baina, politikoki, iraganeko estrategia bera errepikatzen ari da, D3Mk baheketa gaindituko ez duela jakinda. Plataforma sustatzen duten pertsona askok aurretik ilegalizatutako hautes-zerrenden sorreran parte hartu zuen eta, hortaz, azken emaitzaren inguruan ez dago zalantza izpirik ere. Ataka horretan, balizko ilegalizazioa salatu beharra dago, konponbiderik ekartzen ez duen dinamika elikatu gabe. Argazkian, D3Mren aurkezpena / D3M.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun