Epaiaren zain gelditu zen atzo, Pagoa Zulueta eta beste hamaika euskal herritarren aurka, Espainiako Auzitegi Nazionalean egin duten epaiketa. Eneko Perez eta Koldo Rosado nafarrei akusazioa kendu bai, baina Pagoa Zulueta leioaztarraren eta gainontzeko bederatzi lagunen kontrako zigor eskaera berretsi zuen herenegun fiskalak. Leioako gazteari 7 urte t'erdiko espetxe zigorra eskatzen diote, ETAri laguntza eman ziolakoan. Besteak beste, Iñaki Bilbao ETAko kidea Frantziara eramatea leporatzen diote. Egun, 45 urteko espetxe zigorra betetzen ari da Bilbao, 2002ko martxoan gertatu zen Juan Priede Orioko PSE-EEko zinegotziaren hilketagatik kondenatu ostean. Europa Press albiste agentziak zabaldutakoaren arabera, Iñaki Bilbao "osabatzat" daukala aipatu eta Frantziara eraman zuela onartu ei zuen epaiketan Zuluetak, baina ez zekiela bidaiaren arrazoia zein zen. Amnistiaren Aldeko Mugimenduak, ordea, beste lekukorik ezean, deklaratu duten polizia ugariek botatako "kontraesanak" salatu ditu, "auziperatu guztiek akusazioak era borobilean ezeztatu duten bitartean". Argazkian, 2005ean Zuluetaren alde egindako manifestazioetariko bat.
Ibon Fernandez Iradi "Susper"-ren paper emankorretan aurkitutako datuetan oinarritu omen dira Zulueta eta gainontzeko hamaika lagunak erruztatuen aulkian esertzeko. Hala ere, Europa Pressen arabera, Asier Burgaleta kenduta, akusatuak ez zituela ezagutzen adierazi zuen, lekuko gisa, bideo konferentziaz deklaratu zuen Susperrek. Egun, Frantzian dago espetxeratuta. Fiskalak, ordea, "frogatutzat" jo ditu akusazioak. Bere hitzetan, "polizien deklarazioak baloratzea besterik ez dauka tribunalak. Horietako batzuk epaitegian bertan berretsiak izan dira". Bitartean, Amnistiaren Aldeko Mugimenduak "epaiketa-fartsatzat" jo du Madrilgoa, froga bakarrak "torturapean" eta Poliziaren eskuetan egonik lortutako deklarazioak direlako, AAMko kideekin arabera. Gainera, inkomunikazioarekin amaitu arte tortura hor jarraituko duela ziurtatu dute, Algortan pasa den azaroan "torturaren aurkako protokoloa" ezarri arren sarekada hartako lagun guztiak torturatuak izan zirela gogoratuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun