NEGIZ-Baskonia elkarte faxistak bi ekitaldi egin ditu azken urtean Algortan
2009ko urt. 22a, 19:23
Sare Antifaxistak zabaldu duenez, 2008ko hasieran, ekitaldiak egiten ibili zen "ezkutuan" Algortan, eskuin muturreko talde berria. Orain urte bete pasa, urtarrilaren 14an, aurkeztu zuten Ereaga hondartza ondoko hotel "ezagun" batean, NEGIZ-Baskonia elkartea. Aipatu talde faxistak ez du ostalaritza establezimendu horren izena ematen bere webgunean. Hori bai, bertan, Euskal Herri osotik etorritako pertsonak egon zirela diote. "Nova Europa" Gizarte Ikerketa Zentroa (NEGIZ) aurkezteko baliatu zuten ekitaldia, euren hitzetan, "Euskal Herrian nazionalsozialismoaren sugarra itzaltzen ez uzteko". Bigarren ekitaldia toki berean egin zuten, martxoaren 31n. Espainiatik etorritako jendea ere bertan zela, "Democracia show" izenburuko hitzaldia eman zuen eskuin muturreko pentsaera nabarmena erakusten duen Joaquim Bochaca idazleak. NEGIZ-Baskoniak ekitaldi gehiago egiteko asmoa daukala ohartarazi du Sare Antifaxistak; baita euren "mugimenduei adi" egongo direla adierazi ere. Argazkian, NEGIZ-Baskoniaren aurkezpena / Nova Europa.NEGIZ-Baskonia elkartearen eraketa "ez da kontu isolatua", Sare Antifaxistaren ustez. Erakundeko kideek gogoratu dutenez, besteak beste, 2006ko otsailean, "Falange Vasca alderdiko kideak izan zituen lagun Marisa Arrue Getxoko PPko bozeramaileak", Kataluniako Estatutuaren aurka sinadurak batzeko, Areetako Ipotxen plazan egindako ekitaldian. 2008ko ekainean, berriz, Juan Sebastian Elcano deituriko Espainiako armadako ontzia egon zen lau egunez Algortako kaian. Bertan egindako bazkarian dozenaka "elementu faxista" parte hartu zutela salatu du Sare Antifaxistak. Azkenik, Getxoko Txorimalo gaztetxeak jasandako erasoak ere jarri dituzte mahai gainean. "Hauek adibide batzuk baino ez dira. Talde guzti horien arteko harremanak ahulak dira, baina argi dago hazitegia dela Getxo ingurua", ohartarazi du Sare Antifaxistak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun