Eskualdeko gainontzeko udalerrien balantzea jaso artean, Getxon goizeko 6:30ak eta 9:30ak artean jo du gogorren zikloiak. Denbora horretan 150 kilometro orduko haize boladak izan direla aipatu dute tokiko iturriek. Baina, zorionez, denboralea badoa eta Jaurlaritzak Alerta Gorria noiz kendu zain dago Getxoko Udala, atzo 19:00etan itxi zuen Arriluze eta Portu Zaharra arteko bidea berriro zabaltzeko. Kalte materialei dagokionez, zuhaitzak erori, beirate eta balkoiak apurtu, denda batzuen oihalak txikitu eta kale altzariak kaltetu direla adierazi du Josu Loroño Komunikazioa, Herritarren Arreta eta Babes Zibileko zinegotziak.
Orain apurtutakoa konpontzen
Emandako laguntza eskertu die saltzaile eta ostalariei udal agintariak, bereziki kostaldeko establezimenduen jabeei eta aldamio enpresen arduradunei, Udalak emandako jarraibideei kasu egin dietelako. "Horrek kalte pertsonalik gerta ez dadin lagundu du, baita kalte materialak txikiagoak izatea", aipatu du Loroñok. Babes Zibileko arduradun, udaltzain eta udal langileen lana ere eskertu du zinegotziak; goiz osoan, kalean zaintzen, hondakinak kentzen eta garbitzen ibili baitira. Bitartean, Imanol Landa alkateak zuzentzen duen Krisialdi Mahaia Jaurlaritzak alerta egoera kendu arte egongo da indarrean, Loroñok zehaztu duenez.
Dagoeneko zikloiak eragindako kalteak zenbatzen dabil Getxoko Udala. Josu Loroño Komunikazioa, Herritarren Arreta eta Babes Zibileko zinegotziak adierazi duenez, "zorionez, kalte pertsonalik ez du eragin zikloiak. Hori bai, kalte materialak ugariak izan dira etxebizitza zein kale altzari eta zuhaitzetan". Arbolak erori eta hainbat etxeetako beirate eta balkoiak apurtu egin direla aipatu du udal agintariak. Areetako ontziralekuan zein Algortako kirol portuan asko izan dira kalteak jasandako ontziak; baten bat hondoratu ere egin da, Raspas arraun taldeko etxolatik gertu Sapaburu belaontziarekin gertatu bezala. Bitartean, eguerdian, argindarrik gabe jarraitzen zuten oraindik Sopelan, Euskal Herriko beste 300 bat herritan bezala. Iberdrolak jakinarazi du Araban, Bizkaian eta Gipuzkoan 120.000 lagun daudela argindarrik gabe, baina arratsaldean konponduko duela bere bezeroen etxeetako matxura. Goizaldeko 6:30ean hastekoa zen Metro Bilbao garraio zerbitzuak ez du 12:00etara arte ibiltzerik eduki. Orduak behar izan dituzte katenaria eta trenbidera eroritako hondakinak kentzeko. Eusko Jaurlaritzak eguerdian jakinarazi du zikloia bukatzen ari dela. Arazorik handienak kostaldean izango dira, olatuengatik. Jaurlaritzak emergentzia planarekin segituko du. Argazkian, Algortako Satistegi kafetegi gaineko pisuko beiratea txikitu du erabat haizeak. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun